“Эрүүл хүүхэд” төслөөр ЕБС-ийн сурагчдад эрүүл мэндийн боловсролыг тэгш хүртээмжтэй олгож, эрүүл амьдралын дадлыг хэвшүүлнэ
2022-2023 оны хичээлийн жилд орон нутгийн санхүүжилтээр “Эрүүл хүүхэд” төслийг аймгийн ЗДТГ, БШУГ хамтран хэрэгжүүлж байна. Ерөнхий боловсролын сургуулийн сурагчдад эрүүл мэндийн боловсролыг тэгш хүртээмжтэй, цогц хэлбэрээр олгох, эрүүл амьдралын дадлыг төлөвшүүлэх нь энэхүү төслийн зорилго.
Мөн цаашлаад эрсдэлтэй хүчин зүйлийг хувь хүн, гэр бүл, боловсрол, эрүүл мэндийн байгууллагуудын идэвх оролцоо, нэгдмэл үйл ажиллагаанд тулгуурлан төслийн үр дүнд бууруулахыг зорьж байна. Төслийн хүрээнд эрүүл мэндийн сургагч багш бэлтгэх сургалт өчигдөр, өнөөдөр хоёр өдрийн турш Эрүүл мэндийг дэмжих төвд боллоо.
Орон нутгийн санхүүжилт 100 сая төгрөгөөр хэрэгжих төслийн хүрээнд:
- Эрүүл мэндийн сургалтын хөтөлбөр хэрэгжүүлэх жишиг кабинет байгуулж нээлттэй орчин бүрдүүлэх,
- Эрүүл мэндийн хөтөлбөр хэрэгжүүлэх багшийг чадавхжуулах сургалтад үе шаттай хамтруулах,
- Эрүүл мэндийн хөтөч, үе тэнгийн сургагч багшаар дамжуулан хүүхэд, өсвөр үеийнхний амьдрах ур чадвар болон манлайллын чадварт нөлөөлөх үлгэрлэн дэмжих хөтөлбөр зэрэг үйл ажиллагааг хэрэгжүүлэх юм.
Орхон аймгийн хэмжээнд төрийн болон хувийн өмчийн 24 сургуульд 25 багш 19573 сурагчдад эрүүл мэндийн боловсрол олгон ажиллаж байна. Ерөнхий боловсролын сургуулиудад эрүүл мэндийн боловсрол олгох сургалт явуулах зориулалтын кабинет, лаборатори, шаардлагатай сургалтын хэрэглэгдэхүүн сурагчдад хүртээмжтэй бус гээд олон зүйлсийг нэрлэж болно.
2021 оны статистик үзүүлэлтээс харахад сурагчдын дунд хоол боловсруулах тогтолцоо, амьсгалын тогтолцооны өвчин нийт өвчлөлийн тэргүүлэх шалтгаан болж байна.
“ЕБС-ийн сурагчдын эрүүл мэндийн зан үйлийг тодорхойлох” судалгаагаар сурагчдын 12.1 хувь нь илүүдэл жин, таргалалттай, 44.7 хувь нь өглөөний цай тогтмол ууж хэвшээгүй, 33.6 хувь нь өдөр бүр хийжүүлсэн ундаа уудаг, 26.4 хувь нь түргэн хоол, цайны газраар тогтмол үйлчлүүлдэг, 56,5 хувь нь сургууль дээр хоол идэх, цай уухдаа гараа угаадаггүй эсвэл хааяа угаадаг гэсэн судалгааны дүн гарчээ.
Мөн 2018, 2019 онд хэрэгжсэн “Сэтгэлийн анир” зорилтот төслийн хүрээнд хийсэн судалгаанд ерөнхий боловсролын 21 сургуулийн 4754 сурагчийг хамруулсан бөгөөд судалгаагаар 10 сурагч тутмаас 3 сурагч стрессийн дунджаас дээш түвшинд, 10 сурагч тутмын 4 сурагч нь сэтгэл гутралтай байна гэсэн дүгнэлт гарсан нь “Эрүүл хүүхэд” хөтөлбөрийг хэрэгжүүлэх үндэслэл гэдгийг албаныхан онцолж байна.
Мэдээллийн төв
