Автозамын асфальт бетоны шинжилгээний лабораторитай болох асуудлыг судалж байна
Аймгийн авто замын барилга угсралт, шинэчлэлт, өргөтгөл, их засварын ажилд ашиглаж буй материалын чанар, стандартын шаардлага хангалтыг газар дээр нь хянан шалгах, лабораторийн шинжилгээ хийх хэрэгцээ шаардлагын хүрээнд авто замын асфальтбетоны шинжилгээний лаборатори байгуулах асуудлыг судалж байна.
Энэ хүрээнд Салбарын хяналт, зохицуулалтын хэлтсээс авто замын ажилд ашиглаж буй материалын нягт, чийг, зузаан, бат бэх зэрэг үзүүлэлтийг тодорхойлох зориулалт бүхий 13 нэр төрлийн 37 сая төгрөгийн тоног төхөөрөмжийг 2027 оны хөрөнгө оруулалтын төсөвт тусгуулах саналыг хүргүүлжээ.
Лабораторийн шинжилгээ хийх зардлыг 2027 оны төсөвт төлөвлөснөөр авто замын барилга угсралт, засвар, шинэчлэлтийн ажилд ашиглагдаж буй материалын чанар, стандартын шаардлагад тавих хяналтыг сайжруулах, шинжилгээний үр дүнг үндэслэн хяналт шалгалт хийх, авто замын ажлын чанар, ашиглалтын найдвартай байдлыг дээшлүүлэх боломжтой гэж Засаг даргын Өргөтгөсөн шуурхай зөвлөгөөний үеэр мэдээллээ.
Мэдээллийн төв
