С.Цэвээн даргын нэрэмжит Самбо бөхийн өсвөрийн улсын аварга шалгаруулах тэмцээн болно

Эрдэнэт хотын анхны дарга, Монгол Улсад самбо бөхийг үүсгэн хөгжүүлэгчийн нэг С.Цэвээн агсны нэрэмжит “Самбо бөхийн өсвөр үеийн улсын аварга шалгаруулах тэмцээн” энэ сарын 24-26-нд Эрдэнэт хотод болно. "Эрин зууны бахархал Эрдэнэт" хотын түүхт 50 жилийн ойн хүрээнд зохион байгуулахаар төлөвлөсөн томоохон тэмцээнүүдийн нэг нь энэ юм.

С.Цэвээн агсан нь Эрдэнэт хотын хөгжил, бүтээн байгуулалтын эхэн үеийг удирдан чиглүүлсэн анхны дарга бөгөөд тухайн цаг үед аж үйлдвэр, нийгмийн дэд бүтцийг бүрдүүлэхэд чухал үүрэг гүйцэтгэсэн төр, нийгмийн зүтгэлтэн билээ. Тэрбээр зөвхөн хот байгуулалтын салбарт бус, нийтийн биеийн тамир, спортыг хөгжүүлэхэд онцгой анхаарч, ялангуяа самбо бөхийг Монголд дэлгэрүүлэхэд идэвх санаачилга гарган ажилласан түүхтэй.

Самбо бөх нь тухайн үед шинэ тутам хөгжиж байсан спортын төрөл байсан бөгөөд С.Цэвээн агсны дэмжлэг, бодлогоор Орхон аймагт бэлтгэл сургуулилт хийх орчин бүрдүүлж, дасгалжуулагч, тамирчдыг бэлтгэх суурь тавигджээ. Мөн түүний санаачилгаар олон тэмцээн уралдааныг орон нутагтаа зохион байгуулж, залуу үеийг энэхүү спортоор хичээллэх хүсэл зорилгыг нь төрүүлснээр самбо бөхийн анхны тамирчид төрөн гарч, улс, тив, дэлхийд амжилт үзүүлж эхэлсэн гэдэг.

"Эрин зууны бахархал Эрдэнэт" хотын түүхт 50 жилийн ойн хүрээнд зохион байгуулж буй энэ удаагийн тэмцээн нь үе үеийн самбо бөхөөр хичээллэж ирсэн тамирчдын залгамж холбоог бэхжүүлэх, самбо бөхийн спортыг хөгжүүлэх чухал ач холбогдолтой юм.

Энэ удаагийн тэмцээнд 600 орчим өсвөрийн самбочид 18 жинд Азийн болон дэлхийн аварга шалгаруулах тэмцээнд эх орноо төлөөлөн оролцох эрхийн төлөө өрсөлдөнө. Тэмцээнийг Орхон аймгийн Засаг даргын Тамгын газар, Биеийн тамир, спортын газар, Монголын самбо бөхийн холбоо, Орхон аймгийн Самбо бөхийн холбоо хамтран зохион байгуулж байна. Тэмцээнд 2010 оны нэгдүгээр сарын 1-нээс 2012 оны арванхоёрдугаар сарын 31-ний хооронд төрсөн өсвөрийн тамирчид оролцоно.

Мэдээллийн төв