ЭРДЭНЭТ 50: “Эрдэнэт Марафон–2026” бүх нийтийн гүйлтийн тэмцээнд 1275 тамирчин оролцож байна

Эрдэнэт хотын 50 жилийн ой, “Хичээллэе-Өрнүүлье-Хэвшье” аяны хүрээнд “Эрдэнэт Марафон–2026” бүх нийтийн гүйлтийн тэмцээнийг зохион байгуулж байна. Анх удаа нээлттэй хэлбэрээр мэргэжлийн болон сонирхогчдын 14 төрөл, 8 зайн ангилалд зохион байгуулж буйгаараа онцлогтой.

“Эрдэнэт Марафон-2026”-д 1275 тамирчин бүртгүүлсэнээс ОУХМ, Үндэсний шигшээ багийн тамирчин Д.Гантулга, Ж.Олонбаяр, Б.Мөнхзаяа, Г.Хишигсайхан, Орхон аймгийн тамирчин Хөнгөн атлетикийн Монгол Улсын ойрын зайн гүйлтийн төрлийн 5 удаагийн амжилтыг шинэчлэн тогтоосон Монгол Улсын үндэсний шигшээ багийн тамирчин ОУХМ О.Мөнхтүмэн тэргүүтэй тамирчид оролцож байгаа нь өмнөх жилүүдээс илүү өргөн цар хүрээтэй, чансаа өндөр болж буйг илтгэж байна.

Мөн Зэвсэгт хүчний 2026 оны аварга шалгаруулах Марш-тусгай бэлтгэлийн цогцолбор тэмцээнд дэд байр эзэлсэн Зэвсэгт хүчний 186 дугаар ангийн хугацаат цэргийн алба хаагчид, Дархан, Улаанбаатар хотоос иргэд зорьж ирэн оролцож байна.

Тэмцээний нээлтэд УИХ-ын гишүүн, Засгийн газрын гишүүн Батлан хамгаалахын сайд Д.Батлут, аймгийн ИТХ-ын дарга Д.Мөнхбат, аймгийн Засаг дарга Б.Зоригтбаяр болон бусад албаныхан оролцлоо.

2026 онд "Эрин зууны бахархал Эрдэнэт хот"-ын түүхт 50 жилийн ой тохиож буй. Ойг угтан улс, бүсийн чанартай 30 гаруй урлаг, спортын уралдаан тэмцээнийг жилийн турш зохион байгуулахаар төлөвлөсний нэг нь энэхүү “Эрдэнэт Марафон–2026” бүх нийтийн гүйлт юм.

Тамирчид...

21 км – Мэргэжлийн тамирчид, сонирхогчид
10 км – Сонирхогчид / 18-39, 40-49, +50 нас/
5 км – Орон нутгийн иргэд (18+)
3 км – Хүүхэд (14–17 нас)
2.5 км – Байгууллага, хамт олон
1.5 км – Гэр бүлийн гүйлт
1 км – Хүүхэд (10–13 нас)
800 м – Тусгай хэрэгцээт иргэд гэсэн найман ангиллаар оролцож байна.

Зохион байгуулагчид 5км тутамд уст цэг байгуулж, бүх төрлийн гараа, барианы цэгийг хотын төв талбай болох Амарын талбайд төвлөрүүлж, маршрутыг олон улсын шаардлагад нийцүүлэн тэмдэгжүүлсэн байна. Мөн тэмцээний ерөнхий шүүгчээр Монголын Хөнгөн атлетикийн холбооны 8 шүүгч ажиллаж байгаа бол туслах шүүгч, цагдаагийн бие бүрэлдэхүүн, зохион байгуулагч гээд 50 гаруй бүрэлдэхүүн ажиллаж байна.
Тэмцээнийг Орхон аймгийн Засаг даргын Тамгын газар, Монголын хөнгөн атлетикийн холбоо, Орхон аймгийн Биеийн тамир, спортын газар, Орхон аймгийн Хөнгөн атлетикийн холбоо хамтран зохион байгуулж байна.

Мэдээллийн төв