Засаг даргын зөвлөлийн хурлаар хотын болон хөдөө аж ахуйн салбарын өвөлжилтийн бэлтгэл хангах төлөвлөгөөг хэлэлцлээ. /2026.04.16/ 

Эрдэнэт хотын 2026-2027 онд дэд бүтцийн чиглэлээр хэрэгжүүлэх “Өвөлжилтийн бэлтгэл хангах ажил”-ын  төлөвлөгөөг боловсруулахдаа аймгийн Засаг даргын 2024-2028 оны үйл ажиллагааны хөтөлбөрийг хэрэгжүүлэх арга хэмжээний төлөвлөгөө, Орхон аймаг, Эрдэнэт хотын 2026 оны хөгжлийн жилийн төлөвлөгөө болон харьяа байгууллагуудаас ирүүлсэн саналыг судалж гаргажээ. Ингэхдээ  хотын инженерийн шугам сүлжээний найдвартай ажиллагаа, зам талбайн хэвийн байдлыг хангахад чиглэсэн 57 нэр төрлийн ажлыг  төлөвлөгөөнд  тусгасан байна. 

Үүнд тухайн хангагч  байгууллагын дотоод зохион байгуулалтаар хэрэгжих  31 нэр төрлийн ажилд 11,9 тэрбум төгрөг, орон нутгийн төсвийн хөрөнгө оруулалтаар  хэрэгжих 11  ажилд 30.3 тэрбум төгрөг, гадаадын  төслөөр  хэрэгжих 1  нэр төрлийн ажилд 40.1 тэрбум  төгрөг нийт 82,1 тэрбум төгрөгийн  дүнтэй ажлууд байна. 

Орон нутгийн төсвийн хөрөнгө оруулалтаар цахилгаан эрчим хүчний найдвартай байдлыг бий болгох  ажил энэ онд үргэлжлэн хийгдэнэ.

35кВ тойрог схем үүсгэх ажлын хүрээнд Булаг дэд станцаас Оюут дэд станц хүртэлх 9,8 км цахилгаан дамжуулах агаарын шугам барих ажил,  2а хороолол, Оюут багт 2*1000кВа трансформатортой дэд станцыг барьж гүйцэтгэнэ. 
Чингэл багт 35/10 кВ-ын хүчдэл, 2х10 МВА чадалтай "Чингэл" дэд станцын хаалттай хуваарилах байгууламжын тоног төхөөрөмж угсралт, удирдлагын байрны барилга угсралтын ажил энэ онд хийгдэнэ. Уг хөрөнгө оруулалтын үр дүнд  Баянцагаан баг, Эрчим хорооллын цахилгаан хангамжын асуудал шийдэгдэх юм.  

13 байршилд инженерийн шугам сүлжээний шинэчлэлийг үргэлжлүүлэн хийнэ. 
•    Говил  багт УДДТ барих
•    УДТТ-7-9, Баянбулаг, Наран, Булаг-ыг тэжээж байгаа ф219мм төв шугамыг өргөтгөн шинэчлэх. /УДТТ-7-9-өөс Насос станц хүртэлх 1-р хэлхээний төв шугам/  
•    Хүрэнбулаг баг УДТТ 4-1 дулаан, цэвэр усны шугам шинэчлэх
•    Зэст баг 1-р хорооллын бохир ус татан зайлуулах АТТ-288 - АТТ-302 хүртэлх ф-200 голчтой L-376.1м урт  шугамыг Ф-300мм болгон өргөтгөн шинэчлэх 
•    Зэст баг. ЕБС 4-р сургуулийн хичээлийн 2 дугаар байрыг хэрэгцээний халуун усны шугамтай холбох ажил
•    15-р сургуулийн дотор халаалтын шугам сүлжээний их засварын ажил
•    Хөрсний бохирдлыг бууруулах ажлын хүрээнд Баян-өндөр сумын гэр хороололд шаардлага хангасан эко ариун цэврийн байгууламжийн суурийн хэсгийг бариулах ажил
•    20-р сургуулийн ариун цэврийн өрөөний засвар хийх
•    Хүрэнбулаг багт 4-9-р байрны 2-р блок, 4-10-р байрны 1-р блокны сантехникийн шугам сүлжээг засварлах гэх мэт ажил байна. 

Европын сэргээн босголт хөгжлийн банкны санхүүжилтээр 8 байршилд инженерийн шугам сүлжээний ажил дараах байршлуудад үргэлжилнэ. 
•    Даваат баг. №57 ус түгээгүүрийг төвийн шугамд холбох 
•    Шанд баг. №18 ус түгээгүүрийг төвийн шугамд холбох 
•    Наран багийн бохирын шугамыг төвийн шугамд холбох
•    Бүрэнбүст багийн цэвэр усны шугам
•    Уурхайчин багийн цэвэр усны шугам
•    Баянцагаан багийн цэвэр усны шугам
•    Говил багийн цэвэр усны шугам
•    Хүрэнбулаг УДДТ-4-2 багийн төвийн сүлжээний шугам

Мэдээллийн төв