Халдварт өвчний дэгдэлтийг тогтвортой хянахад дэмжлэг үзүүлэх төслийн уулзалт боллоо
Халдварт болон Зоонозын өвчний дэгдэлтийг тогтвортой хянахад дэмжлэг үзүүлэх төслийн II дахь үе шат нийслэл, 8 аймагт хэрэгжихийн нэг нь Орхон аймаг юм. Энэ сарын 14-ний өдөр уг төслийг хэрэгжүүлэх Дэлхийн зөн Монгол ТББ-ын холбогдох албаныхан уулзалт хийлээ.
Тус байгууллага нь 2001-2018 хүртэл Орхон аймагт хүмүүнлэгийн үйл ажиллагаагаа тасралтгүй явуулж ирсэн туршлагатай. Тур дундаа боловсрол, эрүүл мэнд, амьжиргааг дэмжих, хүүхэд хөгжил, хамгаалал, ус, ариун цэвэр, эрүүл ахуй болон уур амьсгалын өөрчлөлтийн нөлөөллийг бууруулах, түүнд дасан зохицоход чиглэсэн нийт 40 гаруй урт хугацааны хөгжлийн хөтөлбөр, 50 гаруй богино хугацааны төслүүдийг амжилттай хэрэгжүүлсэн.
Энэ удаа АНУ-ын Засгийн газрын санхүүжилтээр FHI 360 байгууллагатай хамтран “Халдварт болон зоонозын өвчний дэгдэлтийг тогтвортой хянахад дэмжлэг үзүүлэх – EpiC II” төслийн хоёрдугаар шатыг ирэх есдүгээр сар хүртэл хэрэгжүүлнэ. Энэхүү төслийг хэрэгжүүлснээр малчин иргэдийн амьжиргаа, эрүүл мэндийг хамгаалах нь малчдын хүүхдүүд, тэдний ирээдүйд оруулах томоохон хөрөнгө оруулалт гэж үзэж байна.
Мөн зоонозын гаралтай халдварт өвчний дэгдэлтийн үед олон нийтийн хариу арга хэмжээ, ойлголтыг нэмэгдүүлэх, эрүүл мэндийн байгууллагын харилцаа, мэдээлэл түгээх чадамжийг сайжруулахад чухал ач холбогдолтойгоос гадна салбар хоорондын уялдаа холбоог бэхжүүлэх, үндэсний болон орон нутгийн түвшний бэлэн байдал, хариу арга хэмжээ авах чадавхыг сайжруулах зорилготой юм. Төсөл баруун бүсээс Баян-Өлгий, Ховд, Говь-Алтай, Увс, Завхан, Хойд бүсээс Хөвсгөл, Орхон, Булган аймгуудад хэрэгжинэ.
Мэдээллийн төв
