35/10 кВ-ын “Даваат дэд” станцыг барьж ашиглалтад орууллаа 
Орон нутаг бие даан 5.8 тэрбум төгрөгийн хөрөнгө оруулалтаар 35/10 кВ-ын "Даваат" дэд станцыг барьж, түүнээс салбарласан 18,5 километр цахилгаан дамжуулах агаарын шугам татаж ашиглалтад орууллаа. Дэд станц ашиглалтад орсноор гэр хорооллын айл өрхийн 70 хувийг тэжээж байсан Хороолол дэд станцын ачааллыг бууруулж, эрчим хүчний найдвартай байдлыг сайжрууллаа.  Түүнчлэн гэр хорооллыг дахин төлөвлөх төсөлд 3600 айлын орон сууц, 1200 хүүхдийн сургууль, 900 хүүхдийн цэцэрлэг, 500 хүний суудалтай үзвэрийн газруудын цахилгаан хангамжийг бүрэн шийдвэрлэх боломж бүрдлээ. түүхэн бүтээн байгуулалт юм. Орон нутгийн төсвөөс 40 орчим тэрбум төгрөгийг цахилгаан эрчим хүчийг сайжруулахад зарцуулж, 70 гаруй хөрөнгө оруулалт, бүтээн байгуулалтын ажлыг хийж гүйцэтгэлээ.  

Хавдрын оношилгоо,  эмчилгээний анхны  дэд төвийг Орхон аймагт нээлээ
Монгол Улсын Засгийн газрын 42 дүгээр тогтоолоор  “Эрдэнэт Медикал” эмнэлгийг Хойд бүсийн хэмжээнд Хавдар судлалын үндэсний төвийн  харьяа Хавдрын оношилгоо эмчилгээний дэд төв болгохоор шийдвэрлэв.  Ерөнхий сайд Г.Занданшатар есдүгээр сарын 7-ны өдөр Орхон аймагт ажиллах үеэрээ  тус дэд төвтэй танилцаж, албан ёсоор үйл ажиллагааг нь эхлүүлэв.  ХСҮТ-ийн харьяа орон нутагт байгуулсан анхны  хавдрын эмчилгээ,  оношилгооны жишиг төв болж буйгаараа онцлог юм. Түүнчлэн Хойд бүсийн хэмжээнд хавдрын дэд төвийг байгуулснаар  Орхон, Хөвсгөл, Булган аймгийн иргэдэд хавдрын үеийн эмчилгээ, тусламж үйлчилгээг цогцоор үзүүлэх, баруун аймгуудын иргэд ч зардал багатайгаар хавдрын оношилгоо, эмчилгээнд хамрагдах боломж бүрдлээ. 

Орон нутагтаа  эрэлттэй мэргэжлээр 23 оюутан Сүнчоны Үндэсний их сургуульд суралцаж байна

Орхон аймгаас 23 оюутан БНСУ-ын Сүнчон хотын Үндэсний  их сургуулийн хэлний бэлтгэлд тэтгэлэгээр суралцаж байна. Орон нутагт эрэлттэй байгаа 30 мэргэжлээр гадаадад тэтгэлэгээр суралцах боломжийг оюутан залууст олгох зорилгоор  БНСУ-ын Сүнчон хотын Үндэсний  их сургуультай 2024 онд хамтран ажиллах санамж бичиг байгуулсан. Санамж бичгийн хүрээнд энэ жил ЕБ-ын сургууль төгссөн 23 хүүхдийг Сүнчон хотын Үндэсний  их сургуульд тэтгэлэгээр суралцуулж эхэлсэн юм. Цаашид оюутнууд орон нутагт эрэлттэй 30 мэргэжлээс /инженерийн 22, нийгмийн салбарын 8 мэргэжил/ сонгон суралцана. 

32 байршилд  12км 756 м  шугам шинэчиллээ 
Энэ онд  орон нутгийн төсвийн 28,4 тэрбум төгрөгийн хөрөнгө оруулалтаар 32 байршилд 12км 756м инженерийн шугам сүлжээг  шинэчлэлээ. Тодруулбал хамгийн өндөр эрсдэлтэй дулааны  5.8 км, цэвэр усны 6.36 км, ариутгах татуургын 0.596 метр шугам шинэчлэв. Энэ нь ашиглалтын хугацаа дууссан шинэчлэх шаардлагатай 163 км шугам сүлжээний 8 хувь юм. Хөрөнгө оруулалтын ажлын үр дүнд орон сууцны хорооллын 5824 өрхийг хангаж буй инженерийн шугам сүлжээний нэвтрүүлэх чадвар сайжирлаа. 

Хотын  төвийн гэрэлтүүлгээ шинэчиллээ 
40 гаруй жилийн насжилттай хотын төвийн гэрэлтүүлгээ стандартад нийцүүлэн, 100 хувь шинэчиллээ.  Долоон байршилд орон нутгийн онцлогийг шингээсэн  хоёр төрлийн 380 ширхэг гэрэлтүүлэг суурилуулах ажлыг “Мөнх номгон” ХХК гүйцэтгэв. 
Авто зам  дагуу 275, явган хүний зам дагуух 105 ширхэг гэрэлтүүлгийг шинэчилсэн нь энэ оны онцлох хөрөнгө оруулалтын ажил байлаа. Хотын  гэрэлтүүлэг  шинэчлэлийн үр дүнд орчны аюулгүй байдал  хангагдаж, хөдөлгөөнд  эерэг нөлөө үзүүлж байна. Үүнд орон нутгийн төсвийн 4,8 тэрбум төгрөгийг зарцууллаа. Ирэх жил гэрэлтүүлэг шинэчлэлийн ажил үргэлжилнэ. 

Орхон аймгийн баг тамирчид улс, бүс, тив дэлхийн тэмцээн уралдаанаас 378 медаль хүртлээ 
2025  он Орхон аймгийн баг тамирчид улс, бүс, тив дэлхийн тэмцээн амжилттай оролцож, эх орон, аймаг орон нутгийнхаа нэрийг өндөрт дуурсгалаа. Нийт  378 медалийг баг тамирчид  хүртсэнээс 117 алт, 97 мөнгө, 164 хүрэл медалийг эх орондоо авчирсан байна. 2025 оны 01 дүгээр сарын 29-ны өдрийн  аймгийн Засаг даргын А/75 тоот “Мөнгөн дэмжлэг үзүүлэх батлах тухай”  захирамжийн дагуу тив, дэлхий, олон улс, улсын аварга шалгаруулах спортын  32 төрлийн  43 удаагийн тэмцээнд 318 тамирчин, дасгалжуулагчдад  319,864,000 төгрөгийн  дэмжлэг үзүүллээ. 

Сургууль, цэцэрлэгийн их засварт 22,9  тэрбум төгрөгийг зарцуулав
2025 он аймгийн боловсролын салбарт   тулгамдсан олон асуудлыг шийдсэн онцлогтой жил байв. Сургууль, цэцэрлэгийн засварт орон нутгийн төсөв болон “Болзошгүй аваар”-ын зардлын 22.9  тэрбум төгрөгийг зарцууллаа. 1976-2008 онд  ашиглалтад орсон 50 шахам жил гар хүрээгүй сургууль, цэцэрлэгийн барилгуудаас давхардсан тоогоор 60 гаруй сургалтын байгууллагын хичээлийн байранд сантехник, дээвэр, хана, хаяавч, цонх, дулаалгын засвар үйлчилгээг хийлээ. Үр дүнд төрийн өмчийн бүх сургууль, цэцэрлэгүүдэд тулгамдаад байсан  дулаан алдагдал, сантехникийн шугамын элэгдэл, эвдрэл гэмтэл, дээврийн дусаал зэрэг хүндрэлтэй асуудал шийдэгдэж    багш, сурагчдын сурч, ажиллах орчин нөхцөл сайжирлаа. 

Орхон аймаг хөгжлийн дараагийн үзэл баримтлалаа зарлав
Орхон аймаг  хөгжлийн дараагийн үзэл баримтлалаа тодорхойлон, хүний хөгжил, эдийн засаг, байгаль орчныг харилцан хамааралтай тэнцвэртэй хөгжүүлэхээр зорьж буйгаа “Хойд бүс-Эрдэнэт 2025” эдийн засгийн форумаар олон нийтэд  зарлалаа. 12 жилийг хөгжлийн нэг үе гэж төлөвлөн 2036 он хүртэл “бүтээлч, ухаалаг, тогтвортой” байх үзэл баримтлалыг дэвшүүлсэн. Гурван үе шаттай хэрэгжүүлэх хөгжлийн үзэл баримлалтын эхний үе шат 2025-2028 он хүртэл хэрэгжинэ. 

Хүн амын бүлэг рүү чиглэсэн цогц хөтөлбөрийг баталлаа

Орхон аймаг орон нутгийн онцлогт тохируулан нийгмийн салбарт чиглэсэн “Хүн амын бүлгүүд, нийгмийн салбарын хүний нөөцийн хөгжлийн хөтөлбөр”-ийг хэрэгжүүлэхээр аймгийн ИТХ-аар батлууллаа. Хүүхэд, гэр бүл, эмэгтэйчүүд, эрэгтэйчүүд, залуучууд, ахмад настан, хөгжлийн брэхшээлтэй иргэд зэрэг хүн амын бүлгүүдийн хөгжлийг хангах, боловсрол, эрүүл мэнд, спорт, соёл урлаг, хөдөлмөр нийгмийн хамгаалал зэрэг нийгмийн салбарын хүний нөөцийг хөгжүүлж, чадавхжуулах  зорилготой. 
 “Эрдэнэт хүний хөгжил” уриа бүхий аймгийн Засаг даргын 2024-2028 онд хэрэгжүүлэх үйл ажиллагааны хөтөлбөрийн “Хүний хөгжил” бүлэгт нийгмийн болон хүн амын бүлгийн хөгжлийн талаар олон арга хэмжээ тусгагдсаны нэг нь энэ хөтөлбөр юм.

50 жилийн ойн хүрээнд 50 хүүхдийн зүрхийг эмчилнэ 
Орхон аймаг 50 жилийн ойн хүрээнд 50 бяцхан зүрхийг эмчлэх зорилгоор "Эрдэнэт - 50 зүрх" төслийг “Бундан” ТББ болон “Зүрх мартахгүй хүүхдийн сан”-тай хамтран хэрэгжүүлэхээр санамж бичиг байгууллаа. Жилийн турш хэрэгжих энэхүү төсөлд Эрдэнэт хотын 50 хүүхэд хамрагдах юм. Эхний хүүхэд хагалгаандаа орж эмчилгээгээ эхлүүлээд байна. 

Мэдээллийн төв