Дэнж, Оюут багт “Төрийн үйлчилгээний нэгдсэн төв”-ийг ашиглалтад орууллаа

Эрдэнэт хотын болон Анхдагч илгээлтийн эздийн өдөр өнөөдөр тохиож байна. Энэ өдөр тухайн жилд орон нутгийн төсвийн хөрөнгө оруулалттай томоохон бүтээн байгуулалтуудаа албан ёсоор нээдэг уламжлалтай. Өнөөдөр Дэнж, Оюут багт “Төрийн үйлчилгээний нэгдсэн цогцолбор төв”-ийн барилгыг албан ёсоор нээж, ашиглалтад орууллаа. Нээлтийн арга хэмжээнд аймгийн удирдлагууд, иргэдийн төлөөлөл оролцов.

Оюут баг Эрдэнэт хотын ууган багуудын нэг . Сүүлийн жилүүдэд орон сууцны хороолол эрчимтэй нэмэгдэж, 2102 өрхийн 7590 хүн амтай баг болтлоо өргөжин тэлсэн. Хүн ам нэмэгдэхийн хэрээр төрийн анхан шатны үйлчилгээг нэг дор цогцоор үзүүлэх хэрэгцээ шаардлага үүсээд байсан билээ.

Эдгээр бүтээн байгуулалтууд нь тухайн багийн иргэд болон Засаг дарга нараас гарсан санал хүсэлтэд тулгуурлан хэрэгжсэн хөрөнгө оруулалтын ажлууд юм. Оюут багийн байрыг Орон нутгийн хөгжлийн сангийн 2,3 тэрбум, Дэнж багийн байрыг Баян-Өндөр сумын 3,9 тэрбум төгрөгийн хөрөнгө оруулалтаар ашиглалтад орууллаа.

Дэнж баг нь 1997 онд байгуулагдсан, 1500 гаруй өрх, 5500 орчим иргэнтэй.

Зоорийн давхартайгаа гурван давхар, металл фасад бүхий тус барилга ашиглалтад орсноор өрхийн эмнэлэг, цагдаагийн хэсэг, Багийн ажлын алба зэрэг байгууллагууд нэг дор төвлөрч, иргэд төрийн үйлчилгээг нэг дороос авах боломж бүрдэж байна. Орхон аймаг, Эрдэнэт хот 21 аймгуудаас анхлан багийн цогцолбор байруудыг ашиглалтад оруулж, төрийн анхны шатны үйлчилгээг цогцоор хүргэж байна. Дэнж, Оюут багийн “Төрийн үйлчилгээний нэгдсэн цогцолбор төв” нь 7, 8 дахь багийн байр юм.

Мэдээллийн төв