Асуудал-Арга зам иргэдийн санал асуулга үргэлжилж байна

Аймгийн Засаг дарга Б.Зоригтбаяр өргөтгөсөн шуурхайг удирдан явууллаа. Энэ сарын 17-ны хурлаас өгөгдсөн үүрэг даалгаврын биелэлтийг холбогдох газар, хэлтсээс танилцуулав. Нийт 9 үүрэг даалгавар өгсөнөөс бүрэн хэрэгжсэн 1, хэрэгжиж байгаа 8 үүрэг даалгавар байна. Нийт биелэлт 58,9 хувьтай байна.
Тухайлбал, “Орхон аймгийг 2026-2030 онд хөгжүүлэх таван жилийн үндсэн чиглэл” боловсруулахтай холбогдуулан тулгамдаж буй асуудал, тэдгээрийг шийдвэрлэх арга замын талаарх санал асуулгыг иргэдээс авах ажлыг зохион байгуулах үүрэг даалгаврыг өгсөн.

Үүнд, “Орхон аймгийг 2026-2030 онд хөгжүүлэх таван жилийн үндсэн чиглэл" боловсруулахтай холбогдуулан "Асуудал-Арга зам" санал асуулгыг цахим болон танхимын хэлбэрээр зохион байгуулж байна. Энэ сарын 23-ны байдлаар цахим санал асуулгад 1163, танхимын санал асуулгад 504 иргэн тус тус хамрагдаж саналаа өгчээ. Мөн цахим санал асуулгыг идэвхжүүлэх ажлын хүрээнд багийн ажлын албатай хамтран ажиллаж байна. 23-ны өдрөөс эхлэн санал асуулгад хүүхдийн оролцоог хангах зорилгоор Боловсролын газарт сургуулийн насны хүүхдүүдийг идэвхтэй хамруулах тухай чиглэл хүргүүлсэн гэж мэдээллээ. Иргэдийн санал асуулга ирэх сарын 1-нд хаагдана.

Мэдээллийн төв