Баян худалдааны төв, VI-10 байрны уулзварын гэрэл дохионы зохицуулалтын хугацааг өөрчлөв
Авто замын засвар, шинэчлэлийн ажилтай холбоотойгоор Замын цагдаагийн тасгаас хөдөлгөөн зохицуулалтад анхаарч, дараах арга хэмжээг авч хэрэгжүүлээд байна.
Тухайлбал, авто замын хөдөлгөөний урсгалыг сайжруулах зорилгоор Баян худалдааны төвийн 4 замын уулзвар, Согоот багийн 6 дугаар хорооллын 10 дугаар байрны урд уулзварын гэрэл дохионы зохицуулалтын хугацаанд өөрчлөлт оруулсан. Ингэхдээ хойноос татах хугацаа 15 секунд байсныг 25 секунд, баруун зүүн зөрүүлж татах хугацааг 45 секунд байсныг 30 секунд, зүүнээс баруун эргэх болон баруунаас зүүн эргэх нэмэлт гэрлийн хугацааг 15 секунд болгон тохируулга хийсэн.
Мөн ОХУ-ын Консулын уулзвараас 4-27 дугаар байрны уулзвар хүртэл 07:30 цагаас 08:10 цаг хүртэл баруунаас зүүн чигт нэг чигийн хөдөлгөөнтэй болгосноор хөдөлгөөний эрчим буурч байна гэж мэдээллээ.
Мэдээлэл шуурхай удирдлагын төвтэй хамтран теле хяналтын камерын тусламжтай авто замын урсгалд хяналт тавьж, зохицуулалт хийж байна. Авто замын хөдөлгөөнийг 7 хоног бүрийн Даваа, Мягмар, Лхагва гаригуудад шууд дамжуулалт /live/-аар иргэдэд мэдээлж байна. Хөндлөн чиглэлийн хугацаа их байх нь ачаалал багатай үед хий зогсох, ачаалал ихтэй үед зүүнээс баруун чиглэлд бөөгнөрөл үүсгэдэг тул хасчээ.
Мөн энэ сарын 12-ноос ОХУ-ын Консулын уулзвараас 4-27 дугаар байрны тойрог уулзварыг дөрвөн замын уулзвар болгох ажил эхэлнэ. Үүнтэй холбоотойгоор тус хэсгийн авто замыг 5 хоногийн хугацаанд хаахаар төлөвлөж, хөдөлгөөн зохицуулалтыг боловсруулж байна. Замын цагдаагийн тасгийн 13 алба хаагч хөдөлгөөний ачаалал ихсэж байгаа уулзвар гарц дээр хөдөлгөөн зохицуулалт хийж байна.
Мэдээллийн төв
