Хойд бүсийн төрийн албан хаагчдын зөвлөгөөн Орхон аймагт болно

Төрийн албаны тухай хууль болон төрийн албан хаагчийн ёс зүйн тухай хууль тогтоомж, бодлого төлөвлөгөөний хэрэгжилт, хяналт шалгалтын үр дүн, ёс зүй сахилга хариуцлагыг чанаржуулах зорилгоор “Бүсчилсэн хөгжил - Төрийн албаны манлайлал” сэдэвт зөвлөгөөнийг Монгол Улсын Төрийн албаны зөвлөлөөс зохион байгуулах гэж байна.
Зөвлөгөөн Хойд бүс буюу Орхон, Хөвсгөл, Булган аймгийн төрийн албан хаагчдын зөвлөгөөнөөр ирэх дөрөвдүгээр сарын 7-ны өдөр эхэлнэ. Хоёр өдрийн турш зохион байгуулах үйл ажиллагаанд гурван аймгийн нийт 400 гаруй албан хаагчийг хамруулахаар төлөвлөжээ.
Төрийн албаны хууль тогтоомж болон Хөдөлмөрийн тухай хууль тогтоомж түүний хэрэглээ, Төрийн албан хаагчийн ёс зүйн хууль тогтоомжийн хэрэглээ зэрэг салбар уулзалт, хэлэлцүүлэгүүд эхний өдөр болно. Харин зөвлөгөөний хоёрдахь өдөр “Монгол Улсын төрийн албаны шинэтгэл, сорил, шийдэл", “Төрийн албан хаагчийн хөдөлмөрлөх эрх, нийгмийн баталгааны хэрэгжилт” “Төрийн албаны шинэтгэл-ёс зүй” зэрэг илтгэл, панел хэлэлцүүлгүүд болох ажээ.
Зөвлөгөөнийг Монгол Улсын Их хурлын Төрийн байгуулалтын байнгын хороо, Ёс зүйн дэгийн байнгын хороо, Орхон аймгийн Засаг даргын Тамгын газар, Төрийн албаны салбар зөвлөл хамтран зохион байгуулна.

Мэдээллийн төв