Нөөцийн махыг маргааш худалдаанд гаргана
Аймгийн хүн амын 2025 оны хаврын улирлын хүнсний хэрэгцээнд 200 тонн нөөцийн мах бэлтгэсэн. Энэ сарын 15-наас буюу маргаашнаас Баян-Өндөр суманд 29 цэг, Жаргалант суманд 2 цэг нийт 31 цэгээр худалдан борлуулахаар бэтгэл хангаж байна.
Өнөөдөр ХХААГ, Мал эмнэлгийн газар, ЗДТГ-ын холбогдох албаны хүмүүсээс бүрдсэн ажлын хэсэг “Эрдмийт” ХХК-ийн нөөцийн мах бэлтгэлийн явц, бэлтгэл ажилтай танилцлаа.
Нөөцийн мах бэлтгэлийн сонгон шалгаруулалтад гурван аж ахуйн нэгж оролцсоноос “Эрдмийт” ХХК шалгарч, 100 тонн нь үхрийн мах, 90 тонн нь хонины мах, 10 тонн нь ямааны мах бэлтгэсэн.
Үнийн хувьд үхрийн мах 12300 төгрөг, хонины мах 10300 төгрөг, ямааны мах 8300 төгрөгөөр худалдан борлуулна. Ирэх зургаадугаар сарын 15 буюу 80 хоногийн хугацаанд нөөцийн махыг зах зээлд нийлүүлэх юм.
Мэдээллийн төв
