Мэргэжлийн байгууллагууд сар шинийн баярыг угтан хамтарсан хэвлэлийн хурал хийлээ. Хуралд аймгийн Онцгой байдлын газар, Замын цагдаагийн тасаг, БОЭТ, Ус цаг уур, орчны шинжилгээний газрын холбогдох албан тушаалтнууд оролцож, сар шинийн баярыг угтан хэрэгжүүлж буй арга хэмжээ болон баярын өдрүүдэд хэрхэн ажиллах,  иргэд аюулгүй байдлаа хэрхэн хангах талаар  сэрэмжлүүлэг, зөвлөмжийг хүргэлээ. 

Гол, мөрний мөсөн дээгүүр зорчихгүй байхыг анхааруулав

Онцгой байдлын орлогч, Урьдчилан сэргийлэх тасгийн дарга,хошууч  Г.Нэргүйбаатар:  
-Сар шинийн баярын өдрүүдэд иргэдийн хөдөөг чиглэсэн урсгал нэмэгддэг. Авто машиныхаа бүрэн бүтэн байдлыг хангаж, дулаан хувцастай хол замд зорчхыг уриалж байна. Хамгийн гол нь зорчих чиглэлийнхээ зам маршрутыг өмнө нь сайн судлах, цаг агаар болон бусад мэргэжлийн  байгууллагуудаас өгч буй мэдээллийг тогтмол авах нь зүйтэй. 

 Энэ жил нийт нутгаар харьцангуй дулаан байсантай холбоотойгоор томоохон гол, мөрний мөс цөмрөх осол аваар ихээр гарч буй. Иймд иргэд өөрийн болон ойр дотныхоо хүмүүсийн амь нас, эрүүл мэндэд хариуцлагатай, ухамсартай хандаж, аюулгүй байдлаа хангах шаардлагатай. Мөн  сар шинийн баярын өдрүүдэд ахуйн гал түймрээс урьдчилан сэргийлэхийг иргэдэд сэрэмжлүүлж байна.    Энэ он гарсаар гал түймрийн 23 дуудлага бүртгэгдэж, 78 сая  төгрөгийн эд хөрөнгийн хохирол учирсан байна.

  Гал түймрийн шалтгааны дийлэнх хувийг цахилгаан холболт, ашиглалтаас үүдэлтэй байна.  Тиймээс иргэдийг  цахилгаан угсралтаа мэргэжлийн хүнээр хийлгэхийг зөвлөе. 

Насанд хүрэгчдийн амны хөндийд 700 гаруй нян бактери агуулагддаг

БОЭТ-ийн Эмнэл зүй эрхэлсэн орлогч захирал М.Алтанбек:
Сар шинийн баярын өдрүүдэд БОЭТ-ийн төв хүлээн авах, хүүхдийн хүлээн авах,  халдварт, төрөх эмэгтэйчүүдийн хүлээн авах 24 цагаар ажиллана.  Бүх тасгуудад мэргэжлийн эмч, эмнэлгийн жижүүрийн үүрэг гүйцэтгэнэ.  Сар шинийн баярын өдрүүдэд архины хордлого, осголт, нойр булчирхайн архаг  үрэвсэл, угаарын хийн хордлогоны дуудлага нэмэгддэг. 
Хаврын улиралд тэр тусмаа гуравдугаар сард халдварт өвчний тохиолдлууд нэмэгддэг. Улсын мэдээгээр сүүлийн долоо хоногт салхин цэцэг, улаан бурхан, томуугийн халдвар, менинккокийн халдвар нэмэгдэх ханлагатай байна.

Энэ талаарх зөвлөмж, сэрэмжлүүлэг мэдээг ХӨСҮТ-өөс иргэд олон нийтэд анхааруулан хүргэж байна. Тиймээс олон нийтийн газар бага насны хүүхдийг дагуулж явахгүй байх, гарын ариун цэврийг сайтар сахиж халдвар хамгааллын дэглэмийг сахихийг зөвлөж байна. Насанд хүрэгчдийн амны хөндийд 700 гаруй нян бактери агуулагддаг гэж үздэг. Сар шинийн өдрүүдэд бага насны хүүхдийг үнсэхгүй  байх нь зүйтэй. 

Зөвлөмж:

• Согтууруулах ундааны хэрэглээнд онцгой анхаарах. Хэтрүүлэн хэрэглэсэн нэгнээ гэрт нь заавал хүргэж өгөх. 
•  Гудамж талбайд ухаангүй унасан, биеэ авч явах чадваргүй болсон иргэнийг яаралтай түргэн тусламж эсвэл цагдаагийн  102,103 дугаар дугааруудад мэдэгдэх.
• Аливаа нэгэн баяр ёслолын дараа нойр булчирхайн өвчлөл ихэсдэг. Нойр булчирхайн архаг үрэвсэл сэдэрдэг учраас хэт өндөр илчлэгтэй хоол унд нэг дор идэхээс татгалзах.
•  Халуун хоолыг хүйтэн уух зүйлтэй хамт хэрэглэхгүй байх. 
• Бохир гараар дамжих гэдэсний халдварт өвчнөөс сэргийлэхийг тус тус зөвлөлөө. 

 Зарим байршилд Мэдээлэл шуурхай удирдлагын төв дээрээс камерын тусламжтай  хяналт тавина 

Аймгийн Цагдаагийн газрын Замын цагдаагийн тасгийн дарга, хошууч Х.Одбаяр:

Сар шинийн баяр болохтой холбоотойгоор цагдаагийн байгууллага өндөржүүлсэн бэлэн байдалд бүрэн бүрэлдэхүүнээрээ ажиллаж байна.  Ахуйн хүрээний хулгайн гэмт хэрэг сар шинийн өдрүүдэд ихэсдэг. Тиймээс иргэд орон байрны хулгайн гэмт хэрэгт өртөхөөс сэргийлж өөрсдийн зүгээс эд хөрөнгөндөө хариуцлагатай хандах шаардлагатай.  Сар шинийн өдрүүдэд зонхилдог дуудлага нь гэр орны хулгай байдаг. Зарим байршилд Мэдээлэл шуурхай удирдлагын төв дээрээс камерын тусламжтай  хяналт тавьж байна. 

Мөн өнгөрсөн жил сар шинийн өдрүүдэд согтуугаар тээврийн хэрэгсэл жолоодсон 12 тохиолдол, зам тээврийн 30 осол бүртгэгдсэн. Энгийн өдрүүдтэй харьцуулахад өндөр тоо. 
Архи согтууруулах ундаа хэрэглэсэн үедээ жолооны ард суух, жолоо барих зочид гийчиддээ согтууруулах ундаа өгөхөөс татгалзах хэрэгтэй. Энэ нь жолооч та өөрийн болон бусдын амь  нас, эрүүл мэндийг эрсдэлд оруулахгүй байх хамгийн зөв алхам юм. 

 Монголчууд бид айргийг цагаан идээ гэж хэрэглэдэг. Гэвч үүнийг холбогдох хууль журамд хориглосон байдаг.  Цагдаагийн байгууллагаас өгч  байгаа зөвлөмжийг дагаж хөдөлгөөнд оролцохыг нийт жолооч нараасаа хүсье. 

Мэдээллийн төв