Өрхийн эмнэлгүүдтэй хамтын ажиллагааны гэрээ байгууллаа

Жил бүр өрхийн эрүүл мэндийн төвүүд аймгийн Засаг дарга, Эрүүл мэндийн газартай тухайн жилд хамтран ажиллах гуравласан гэрээг байгуулдаг. Өнөөдөр найман ӨЭМТ-тэй 2025 онд хамтран ажиллах гэрээнд аймгийн Засаг Б.Зоригтбаяр, Эрүүл мэндийн төвийн дарга Ц.Мөнхцэцэг нар гарын үсэг зурлаа.
Найман өрхийн эмнэлгийн өнгөрсөн оны гэрээний биелэлт “хангалттай” буюу 80 хувиас дээш үнэлэгдсэн. Өнгөрсөн оны жилийн эцэст гүйцэтгэлийн үнэлгээний дундаж 96.7 хувь болж, 2023 оны мөн үеийнхтэй харьцуулахад 8.4 хувиар нэмэгдсэн үзүүлэлттэй байна.

Аймгийн Засаг дарга Б.Зоригтбаяр “Эрүүл мэндийн тусламж үйлчилгээ анхан шатандаа иргэн бүрт чанартай, шуурхай, хүртээмжтэй хүргэх нь чухал. Мөн Өрхийн эрүүл мэндийн төвүүд гэрээнд тусгасан чиг үүргийг чанартай биелүүлэхэд анхаарах хэрэгтэй” гэв.

2024 онд орон нутгийн 139 сая төгрөгийн үнэ бүхий тоног төхөөрөмж, техник хэрэгслийг өрхийн эмнэлгүүдэд хүлээлгэн өгсөн. Тухайлбал, гурван өрхийн эрүүл мэндийн төвд мобайл технологи, мөн гурван өрхийн эрүүл мэндийн төвд шарлагын аппарат, нэг өрхийн эрүүл мэндийн төвд цусны дэлгэрэнгүй шинжилгээний анализатор, нярайн шарлалт хэмжигч билиметр, зөөврийн эхо зэрэг тоног төхөөрөмжөөр тус тус хангасан.

Энэ оноос эрүүл мэндийн анхан шатны байгууллагуудын урсгал зардлыг орон нутгийн төсвөөс хариуцахаар болсон билээ. Мөн өнгөрсөн онд цэцэрлэгийн хүүхэд багачуудад урьдчилан сэргийлэх үзлэг, ерөнхий боловсролын сургуулийн сурагчдад стрептококкийн шинжилгээ, зүрхний цахилгаан бичлэг, их дээд сургууль, коллежийн оюутнуудад халдварт өвчний эрт илрүүлэг, ахмад настанд хавдрын маркераар эрт илрүүлэг зэрэг нийгмийн эрүүл мэндийн ажлыг үр дүнтэй зохион байгуулж ажилласан.
Энэ онд дээрх үйл ажиллагааг үргэлжлүүлэхээр хамтын ажиллагааны гэрээнд тусгажээ.

Мэдээллийн төв