ЭБЦТС ТӨХК: Цахилгааны төлбөр нь хэт өндөр буюу 300 кВт цагаас дээш гарч байгаа айл өрхийн судалгааг гаргана
Цахилгааны үнэ нэмэгдсэнтэй холбоотойгоор халаалтаа цахилгаанаар шийдсэн айл өрхүүдийн сарын хэрэглээний төлбөр өндөр гарч байгаа талаар санал, гомдол иргэдээс ихээр гарч буй. Үүнтэй холбоотойгоор “ЭБЦТС” ТӨХК-ийн инженер, техникийн ажилчид энэ долоо хоногоос эхлэн гэр хорооллын айл, өрхүүдээр орж ажиллах төлөвлөгөөг боловсруулжээ.
Ингэхдээ цахилгаан, эрчим хүчний хэрэглээний сарын төлбөр нь хэт өндөр буюу 300 кВт цагаас дээш гарч байгаа айл өрхүүдийн судалгааг гаргаж, уг судалгаан дээр үндэслэн тухайн өрхөөр орж цахилгаанаа хэмнэх боломж, зөвлөгөөг өгөхийн зэрэгцээ дулаан алдагдлыг нь хэмжих юм байна.
Цахилгаан эрчим хүчээр халаалтаа шийдсэн айл өрх нэгдүгээрт дулаан алдагдалгүй байх ёстой. Хоёрдугаарт өдрийн хэдийд цахилгаанаа залгаж, хэзээ таслах вэ гэхчлэн бага хэрэглээнд нийцсэн арга аргачлалыг мэддэг байх нь чухал юм. Тиймээс мэргэжлийн байгууллагын зөвлөгөөг газар дээр нь биечлэн хүргэхээр төлөвлөжээ.
Орхон аймаг, Эрдэнэт хотод 0-150 кВт цаг хэрэглэдэг хэрэглэгч 60 хувь, 150-300 кВт цаг хэрэглэдэг хэрэглэгч 20 хувь, 300 кВт-аас дээш хэрэглэгч 20 хувьтай байдаг байна.
Мэдээллийн төв
