“Орлогод нийцсэн орон сууц”-ны байрны А  буюу дөрөв дэх блокноос худалдан авах хүсэлтэй иргэдийн цахим бүртгэл энэ сарын 12-ны 09:00 цагт эхэлнэ. Цахим бүртгэлтэй холбоотой асуудлаар ажлын хэсгийн дарга,  аймгийн ЗДТГ-ын Хууль эрх зүйн хэлтсийн дарга Б.Мөнхбаяр мэдээлэл хийлээ. 

Бүртгэлийг олон нийтэд нээлттэй ил тод, шударга байх зарчмыг баримталж Шинжлэх ухаан технологийн паркийн smarterdenet.mn  вэб сайтаар зохион байгуулна.  Энэ удаа 1-3 өрөөний сонголттой 45  байрыг иргэдэд худалдан борлуулна. 

ЦАХИМ БҮРТГЭЛ: 2025 оны 02 дүгээр сарын 12-ны  09:00 цагт нээгдэж 2025 оны 02 дугаар сарын 13-ны  09:00 цагт   хаагдана. 

Вэб сайтын давуу тал нь иргэд гар утас, суурин компьютeр, нөүтбүүк гэхчлэн аль ч төхөөрөмжөөр бүртгүүлэх боломжтой юм.   Асуулга тус бүрээр бүрдүүлсэн баримт материалаа оруулах бөгөөд  дутуу эсвэл алдаатай оруулбал  засаж, нөхөж  оруулах  боломжгүйг анхаарна уу.  Өмнө нь  материалаа бүрдүүлсэн иргэд шинээр материал бүрдүүлэх шаардлагагүй юм. 

ШУТП-ийн программ хангамжийн инженер Б.Дэлэгжунай smarterdenet.mn -д ямар нэгэн ачаалал үүсэж доголдохгүй. Мөн иргэн  хэдэн цаг, хэдэн минутад бүртгэл нь баталгаажсаныг тэр даруй  харах боломжтойг онцлов. 

Мөн тус орон сууцны байрны авто машины зогсоолыг иргэдэд худалдан борлуулах тул сонирхсон иргэд аймгийн Орон нутгийн өмчийн газарт хүсэлт гаргана уу. 
ЖИЧ: авто машины зогсоол худалдан авах хүсэлтэй иргэд ямар нэгэн  баримт бичиг бүрдүүлэхгүй болно. 

Аймгийн Иргэдийн Төлөөлөгчдийн хурлын 2023 оны 12 дугаар сарын 02-ны өдрийн 17/06 дугаар тогтоолоор батлагдсан “ОРЛОГОД НИЙЦСЭН ОРОН СУУЦНЫ ЖУРАМ”-д заасан доорх баримт материалыг бүрдүүлнэ. 
2.1.Орон сууцны байр худалдан авах иргэдэд тавигдах шаардлага:
•     2.1.1.Орон сууцны байр худалдан авах хүсэлт гаргасан айл өрх нь улсаас орон сууцны байр хувьчилж аваагүй байх;
•    2.1.2.Орон сууц худалдан авах хүсэлт гаргасан айл өрх нь өмнө нь төрөөс хөнгөлөлттэй нөхцөлөөр олгох түрээсийн болон бусад орон сууцны хөнгөлөлт эдлээгүй байх;
•    2.1.3.Орон сууцны байр худалдан авах айл өрх нь өөрийн өмчлөлийн орон сууцны байргүй байх;
•    2.1.4.Гэр хороололд оршин сууж амьдардаг байх;
•    2.1.5.Аав, ээж, ах, эгч, үр хүүхдүүдтэйгээ хамт болон түрээсийн байранд амьдардаг байх /нотариатаар баталгаажуулсан түрээсийн гэрээ хавсаргах/,
•    2.1.6.Худалдан борлуулах байрны төлбөрийг 100 хувь төлөх санхүүгийн эх үүсвэртэй байх (арилжааны банкны зээлд хамрагдаж болно);
2.3.Орон сууцны байр худалдан авах айл өрхийн бүрдүүлэх баримт бичиг:
•    2.3.1.Иргэний үнэмлэхний лавлагаа /ТҮЦ машин, e-mongolia программаас гэр бүлийн гишүүний хамт/;
•    2.3.2.Оршин суугаа газрын лавлагаа /ТҮЦ машин, e-mongoliа программаас  гэр бүлийн гишүүний хамт/;
•    2.3.3.Ам бүлийн тодорхойлолт оршин суугаа багаас /гэр бүлийн гишүүний хамт/;
•    2.3.4.Гэрлэлтийн лавлагаа /ТҮЦ машин, e-mongolia программаас /;
•    2.3.5.Орлого тодорхойлох баримт бичиг /нийгмийн даатгалын дэвтэр, тэтгэвэр, тэтгэмжийн дэвтэр, хувиараа хөдөлмөр эрхлэгч түрээслүүлэгчийн хувьд орлого нотлох баримт, дансны хуулга хураангуйгаар/;
•    2.3.6.Үл хөдлөх эд хөрөнгө өмчилж байгаа болон шилжүүлсэн тухай лавлагаа ТҮЦ машин, e-mongolia программаас  гэр бүлийн гишүүний хамт/;

Мэдээллийн төв