Уран эгшиг сургуулийн урлаг, спорт заалны өргөтгөл ашиглалтад орлоо
Урлагийн төрөлжсөн сургалттай “Уран эгшиг” сургуулийн урлаг, спорт заалны өргөтгөл ашиглалтад орж, өнөөдөр нээлтээ хийлээ. Нээлтийн арга хэмжээнд сурагчид, багш, эцэг эхчүүдийн төлөөлөл, аймгийн ИТХ-ын дарга Д.Мөнхбат, аймгийн Засаг дарга М.Түмэнжаргал болон бусад холбогдох албаныхан оролцов.
24*12-ийн хэмжээтэй хоёр давхар өргөтгөлийн хоёр давхарт нь 400 хүүхдийн багтаамжтай урлаг заал, нэг давхарт нь эрүүл мэндийн шаардлага хангасан агч модон шалтай спорт байна. Түүнчлэн спорт заалтай хамт сургуулийн гал тогоо, хоолны заалыг хамтад нь шийдсэн. Тус өргөтгөл ашиглалтад орсноор сурагчид хүссэн үедээ бэлтгэл сургуулилтаа хийх орчин нөхцөл бүрдлээ.
Орон нутгийн төсвийн 2,1 тэрбум төгрөгийн хөрөнгө оруулалтаар “БАГАНДАТ” ХХК гүйцэтгэж, ийн гэрээний хугацаанд нэг жилийн дотор ашиглалтад орууллаа.
"Уран эгшиг" сургуулийн энэхүү өргөтгөл нь 2021-2024 онд орон нутаг өөрийн хөрөнгөөр барьж байгуулсан боловсрол, соёлын салбарын 4 дэх бүтээн байгуулалт болохыг аймгийн Засаг дарга М.Түмэнжаргал онцлон хэлсэн. Мөн тэрээр, аймгийнхаа авьяаслаг сурагчдыг дэмжиж, бүтээн байгуулалтын ажлыг санаачлан эхлүүлсэн С.Батжаргал, санхүүжилтийг шийдвэрлэхэд дэмжлэг үзүүлсэн хурлын төлөөлөгчдөд талархал илэрхийлээ.
2021 онд хүүхдэд урлагийн зохих төвшний боловсрол олгож, хүүхдийн авьяасыг хөгжүүлэх зорилгоор орон нутагт анх удаа урлагийн төрөлжсөн сургалттай “Уран эгшиг” ерөнхий боловсролын сургуулийг байгуулж байв. Анх 8 багш 300 орчим сурагчтай нээгдэж байсан тус сургууль өдгөө 68 багш, ажилчидтай 500 гаруй сурагчтай болж, урлагийн 14 төрлөөр авьяасыг нь хөгжүүлж байна.
2022 онд тус сургуулийн хичээлийн байрны асуудлыг орон нутгийн нөөц боломжид тулгуурлан шийдвэрлэж, 2022-2024 онд орон нутгийн төсвийн нэг тэрбум төгрөгийн хөрөнгө оруулалтаар сургалтын орчин нөхцлийг сайжруулж, шаардлагатай хэрэглэгдэхүүн, техник хэрэгслээр хангасан билээ.
Орхон аймаг 2021-2024 оны хооронд боловсролын салбартаа улс болон орон нутгийн төсвийн 90 орчим тэрбум төгрөгөөр хөрөнгө оруулалт хийгээд байна. Цэцэрлэг, сургуулийн хүртээмжийг нэмэгдүүлэхэд онцгой анхаарч энэ хугацаанд гурван цэцэрлэгийн өргөтгөл, гурван шинэ цэцэрлэгийн барилга, нэг сургуулийн өргөтгөл болон шинэ номын санг ашиглалтад оруулсан.
Мэдээллийн төв
