Ирэх сарын 1-нээс төрийн үйлчилгээний албан хаагчдад орон нутгийн нэмэгдэл олгоно
Аймгийн ИТХ-ын ээлжит бус 18 дугаар хуралдаанаар аймгийн 2024 оны тодотгосон төсвийг хэлэлцэж баталлаа. Танилцуулгыг аймгийн Засаг дарга М.Түмэнжаргал хийв. Тэрээр, улсын төсөвт тодотгол хийсэнтэй уялдуулан орон нутгийн төсөвт тодотгол хийх зайлшгүй шаардлага бий болсон. Иймд өнөөдөр аймгийн ИТХ-ын хурлын хуралдаанаар 2024 оны орон нутгийн төсвийн тодотголыг хэлэлцүүлж байна. Аймгийн 2024 оны тодотгосон төсвийн төсөлд улсын төсвийн тодотголоор аймгийн төсөвт орсон өөрчлөлтүүдийг тусгасан.
Мөн 2023 оны төсвийн гүйцэтгэлийн үр дүнд үүссэн хэмнэлт, давсан орлогыг аймгийн хэмжээнд шийдвэрлэх шаардлагатай асуудлуудыг эрэмбэлэн, нэн шаардлагатай төсөл хөтөлбөрийг санхүүжүүлэх, хөрөнгө оруулалт, бүтээн байгуулалтын ажлуудыг хийж гүйцэтгэхээр тусгалаа” хэмээсэн.
Зарим төрийн байгууллагын төрийн үйлчилгээний албан хаагчдад орон нутгийн нэмэгдлийг үндсэн цалингийн 20 хувиар олгоход шаардлагатай 2,3 тэрбум төгрөгийн санхүүжилтийг төсвийн тодотголд тусгасныг төлөөлөгчид дэмжсэн юм. Ингэснээр ирэх аравдугаар сарын 1-нээс босоо удирдлагатай боловсрол, соёл урлаг, эрүүл мэнд, биеийн тамир, спортын салбарын 61 байгууллагын төрийн үйлчилгээний 2683 албан хаагчдад орон нутгийн нэмэгдэл олгох боломжтой боллоо.
Энэ оны дөрөвдүгээр сард Засгийн газрын шийдвэрээр орон нутгийн нэмэгдэлд хамрагдалгүй үлдсэн төрийн үйлчилгээний албан хаагчид суурь нэмэгдэл авах эрх зүйн орчныг бүрдүүлсэн. Энэ хүрээнд уг асуудлыг хэлэлцэж аймгийн ИТХ-ын ээлжит бус 18 дугаар хуралдаанаар шийдвэрлэлээ.
Мэдээллийн төв
