Аймгийн ИТХ-ын ээлжит 18 дугаар хуралдаанаар “Орон нутгийн өмчит байгууллагуудын дүрэм, бүтэц орон тоонд нэмэлт” өөрчлөлт оруулах тухай асуудлыг хэлэлцлээ.  Тодруулбал, Хот тохижуулах газар, Нийтлэг үйлчилгээний алба, Хот  байгуулалт, барилга захиалагчийн алба, Мэдээлэл шуурхай удирдлагын төвтэй холбоотой асуудлыг хэлэлцэв. 

 Хот тохижуулах газарт авто замын засвар, арчилгаа хариуцах  7 орон тоотой хэсэг байгууллаа 

Орон нутгийн чанартай 130 км хатуу хучилттай авто зам, сайжруулсан шороон зам, хэвтээ болон босоо тэмдэглэгээ, түүний арчилгаа тордолтын ажлыг гүйцэтгэхэд орон тоо хангалттай бус.  Мөн орон нутгийн хөрөнгө оруулалтаар 4 ширхэг автомашин, механизм ирэхтэй холбогдуулан  Хот тохижуулах газарт авто замын арчлалт, засварыг хариуцах хэсэг байгуулж, шинээр 7 орон тоог  нэмэгдүүлж байгаа юм. 

Өмнө нь авто замын засвар арчилгааг “Орхон АЗЗА”  хариуцдаг байсан бол ийн Хот тохижуулах газар руу шилжүүлж, хүний нөөцийг нэмэгдүүллээ. Үүнд, автозамын 1 техникч, автозамчин 3, авто замын төхөөрөмжийн  оператор 2 нийт 7  орон тоо байна.  Хот тохижуулах газар 279 орон тоотой үйл ажиллагаа явуулж байгаа бөгөөд 7 орон тоогоор  нэмэгдүүлснээр 286 болж байна. 

Мэдээлэл шуурхай удирдлагын төвийн орон тоог хоёроор нэмэгдүүллээ 

Орхон аймаг  камержуулалтаа   нэмэгдүүлж “Green zone” буюу ногоон бүс болгохоор зорьж буй. Камержуулалтын тоо нэмэгдэхийн хэрээр засвар үйлчилгээний ажил нэмэгдэж, камерын засварын ажлыг гүйцэтгэхэд орон тоо хүрэлцэхгүй байгаа юм. Иймд Мэдээлэл шуурхай удирдлагын төвөөс техникчийн орон тоог 2-оор нэмэгдүүлэх саналыг боловсруулж, аймгийн ИТХ-ын ээлжит 18-дугаар хуралдаанаар хэлэлцүүллээ. 

Энэ онд орон нутгийн төсвийн 4 тэрбум төгрөгийн хөрөнгө оруулалтаар нийтийн эзэмшлийн талбай болон сургууль, цэцэрлэгийн орчмыг камержуулна. Тодруулбал, нийтийн эзэмшлийн зам талбайд дугаар илрүүлэгч бүхий тусгай зориулалтын 10 камер, сургууль, цэцэрлэгийн гадна болон дотор орчинд 348 камер суурилуулж, камерийн хяналтын системийг сайжруулна. Үүнд, 1,1 тэрбум төгрөгийг зарцуулах юм.  Одоо ажиллаж байгаа 600 гаруй камер дээр энэ онд 696 камерийг  шинээр суурилуулснаар аймгийн хэмжээнд  1372 камертай болох учир камерын засварын ажлыг гүйцэтгэх техникчийн орон тоог 2-оор нэмэгдүүллээ. 

         Хот байгуулалт, барилга захиалагчийн албаны  авто замын хяналтын инженерийг нэгээр нэмэгдүүлэв 

Хот байгуулалт, барилга захиалагчийн алба” ОНӨААТҮГ  авто замын хяналтын нэг инженерт ногдох ачааллыг бууруулах, хяналтын ажлаа сайжруулах зорилгоор аймгийн  ИТХ-ын 2023 оны 07 дугаар сарын 08-ны өдрийн 11/03 дугаар батлагдсан орон тоог 1-ээр  нэмэгдүүлж нийт орон тоог 29 болгож батлуулах саналыг хэлэлцүүллээ. 

Тус байгууллага нь нэг авто замын хяналтын инженертэй. Өнгөрсөн онд авто зам, явган хүний зам, тохижилт, сайжруулсан зам зэрэг 4,3 тэрбум төгрөгийн төсөвтэй  33 ажилд нэг инженер хяналт тавьсан. Энэ онд замтай холбоотой 96 ажилд тус байгууллагаас хяналт тавих учир ийн авто замын хяналтын инженерийн орон тоог нэгээр нэмэгдүүлж байна. 
Өөрөөр хэлббэл, нэг хяналтын инженерт ногдох ачааллыг бууруулах зорилгоор үндсэн орон тоон дээр 1 инженер, гэрээтээр 2 инженерийн орон тоог нэмэгдүүлснээр 1 инженерт ноогдох ачааллыг 30 болгон бууруулах боломжтой гэж үзжээ. 
 

            Залуучуудын ордны 14 орон тоог Нийтлэг үйлчилгээний албанд  шилжүүллээ 

Засгийн газрын 378 дугаар тогтоолын хүрээнд Гэр бүл хүүхэд залуучуудын хөгжлийн газар Хүүхэд гэр бүлийн хөгжил хамгааллын газар болон өөрчлөгдөж, залуучуудын хөгжлийн чиглэлээрх чиг үүрэг, бүтэц нь хасагдсан. Тиймээс хууль тогтоомжийн хэрэгжилтийг хангах үүднээс тус ордны 14 албан хаагч  Нийтлэг үйлчилгээний албанд  шилжиж байна.   Удирдлага зохион байгуулалтаар аймгийн ЗДТГ-ын Нийгмийн бодлогын хэлтэс хангаж ажиллах юм. 

Мэдээллийн төв