Г.Нэргүйбаатар:Иргэд “What3words” апп-ийг гар утсандаа суулгаснаар сүлжээтэй, сүлжээгүй аль ч үед тусламж дуудах боломжтой
Онцгой байдлын газраас сар шинийн баярын өдрүүдэд иргэдийн аюулгүй байдлыг хангах чиглэлээр дараахь мэдээллийг хүргэж байна.
Тус газрын орлогч, урьдчилан сэргийлэх тасгийн дарга,хошууч Г.Нэргүйбаатар:
-Улсын хэмжээнд өнөөдрийн байдлаар нийт газар нутгийн 80-90 хувь нь цасан бүрхүүлтэй, цасны зузаан 10-20 см байна. Сар шинийн баярын өдрүүдэд иргэдийн хөдөөг чиглэсэн урсгал нэмэгддэг. Автомашиныхаа бүрэн бүтэн байдлыг хангаж, дулаан хувцастай хол замд зорчхыг уриалж байна. Хамгийн гол нь зорчих чиглэлийнхээ зам маршрутыг өмнө нь сайн судлах, цаг агаар болон бусад мэргэжлийн байгууллагуудаас өгч буй мэдээллийг тогтмол авах нь зүйтэй. Иргэддээ нэг зүйлийг сануулж хэлэхэд хөдөө гадаа зорчих иргэд маань “What3words” аппликейшнийг гар утсандаа суулгах хэрэгтэй.
Эрэн хайх аврах ажиллагаанд чиглэсэн гурван үгт гар утасны энэхүү аппликейшнийг гар утсандаа суулгаснаар сүлжээтэй, сүлжээгүй аль ч үед тусламж дуудах боломжтой.
Мөн сар шинийн баярын өдрүүдэд ахуйн гал түймрээс урьдчилан сэргийлэхийг иргэддээ анхааруулья. Энэ он гарсаар гал түймрийн 19 дуудлага бүртгэгдсэн. Үүнийг өнгөрсөн оны мөн үетэй харьцуулбал 15 хувиар өссөн үзүүлэлт юм.
Гал түймрийн дуудлага, мэдээлэл өссөн шалтгаан нь иргэдийн санамсар болгоомжгүйгээс үүдэлтэй байна. Тодруулбал, цахилгаан угсралт, ашиглалтаас үүдэлтэй гал түймэр ихэнх хувийг эзэлж байна. Тиймээс иргэдийг цахилгаан монтаж, цахилгаан угсралтаа мэргэжлийн хүнээр хийлгэж байхыг зөвлөе.
Мэдээллийн төв
