Томуугийн эсрэг авч хэрэгжүүлэх арга хэмжээний санхүүжилтыг шийдвэрлэв
Аймгийн Онцгой комисс хуралдаж аймгийн хэмжээнд томуу, томуу төст өвчний халдварын нөхцөл байдал, хариу арга хэмжээ, БОЭТ-өөс томуу, томуу төст өвчлөлийн эсрэг авч хэрэгжүүлж буй арга хэмжээ зэрэг хоёр асуудлыг хэлэлцсэн.
Аймгийн хэмжээнд бага насны хүүхдүүдийн дунд томуу, томуу төст өвчний тархалтын түвшин ихсэж, эмнэлгийн үйлчилгээний ачаалал гурав дахин нэмэгдсэнтэй холбогдуулан хариу арга хэмжээ авч хэрэгжүүлэх Засаг даргын А/937 тоот захирамж гарлаа.
Тодруулбал, бэлэн байдлыг шуурхай хангах ажлын хүрээнд эмч, эмнэлгийн мэргэжилтнүүдийг уртасгасан цагаар ажиллуулах, нэмэлтээр ор дэлгэхэд шаардлагатай зөөлөн эдлэл, автомат дуслын шахуурга, утлагын аппарат болон хүчилтөрөгч өтгөрүүлэгчийн тоног төхөөрөмж, шатахууны зардалд шаардагдах 80 сая төгрөгийн санхүүжилтыг Онцгой комиссын зардлаас гаргахаар шийдвэрлэв. Өнөөдрийн байдлаар Хүүхдийн тасгийн 55 орыг 140 болгон нэмэгдүүлэхийн зэрэгцээ Халдвартын тасгийн А корпуст 30 ор дэлгэсэн. Мөн Хүүхдийн амбулаторын их эмчийн тоог нэгээр нэмэгдүүлж, Сэргээн засах тасгаас нэг сувилагчийг хүүхдийн физик эмчилгээний кабинетэд ажиллуулж эхэлсэн.
Халдвартын тасагт нээн ажиллуулж байгаа 30 хүүхдийн оронд 1 их эмч, 5 сувилагч, 2 үйлчлэгчийг нэмэлтээр ажиллуулж байгаа бол хүлээн авах хэсэгт орой 16:00 цагаас 24 цаг хүртэл нэмэлтээр гурван эмч 1 сувилагч ажиллуулж эхэлсэн. Томуу, томуу төст өвчний халдварын нөхцөл байдал улсын хэмжээнд идэвжлийн төвшинд байгаа бол улсын дунджаас өндөр 13 аймаг байгаагийн нэг нь Орхон аймаг байна. БОЭТ-ийн Хүүхдийн хүлээн авахын тасгаар өнгөрсөн долоо хоногт 881 хүүхэд үйлчлүүлсэн нь өмнөх долоо хоногоос 40 тохиолдлоор нэмэгдсэн үзүүлэлт юм.
• Мэндцэцэн, Нийцэл, Учралтбаяр, Үйлсбадрах зэрэг 4 өрхийн эрүүл мэндийн төв ажлын өдрүүдэд 18:00-20:00 цаг хүртэл
• Бүх өрхийн Эрүүл мэндийн төвүүд хагас, бүтэн сайн өдрүүдэд 11:00-16:00 цагийн хооронд ажиллана.
Мэдээллийн төв
