Бага ангийн багш Л.Баярмаа:Токкацү арга зүйгээр манай ангийн сурагчид цүнхний жингийн асуудлаа шийдсэн
Аймгийн ЗДТГ,БШУГ-аас ерөнхий боловсролын бага сургуулиудад Япон улсын боловсролын хүүхэд хүмүүжлийн эерэг Токкацү арга зүйг нэвтрүүлээд багагүй хугацаа өнгөрч байна.
Нийгмийн харилцаанд хүүхдүүдээ багаас нь бэлтгэж, өөрийгөө илэрхийлэх чадварыг суулгах нь энэхүү арга зүйн үр дүн юм. Тодруулбал, энэ арга зүйн үр дүнд бага ангийн сурагчид бие дааж шийдвэр гаргах, асуудлыг хамтаар хэлэлцэх, өөрийгөө илэрхийлэх чадварт суралцаж байна.
Өнгөрсөн тавдугаар сард аймгийн бага боловсролын 10 багш Япон улсад зочилж, Токио хотын таван сургуулиас Токкацү арга зүйн туршлага судлаад ирсэн. Япон улсын ахмад багш, доктор Огава Ёшихиро манай аймгийн 160 гаруй бага боловсролын багшид Токкацү-н мэргэжил арга зүйн дэмжлэг үзүүлэх сургалтыг зохион байгуулсан юм.
XIII сургуулийн 3б ангийн багш Л.Баярмаа:
-Энэ арга зүйгээр манай анги цүнхний жингийн асуудлаа шийдсэн. Хүүхдүүд өөрийн жингээсээ хэтэрсэн цүнх үүрэх нь чухал уу, биедаа таарсан жинтэй цүнх үүрэх нь чухал уу гэдэг асуудлыг дэвшүүлж, хамтаараа хэлэлцэж шийдлээ гаргасан. Ангидаа номын тавиуртай болж, сурагчид маань цүнхний жингийн асуудлаа шийдлээ.
Мөн хүүхдүүд бие биенийхээ ар нурууг харж суудаг уламжлалт байдлыг халж, ширээгээ дугуй хэлбэрээр зассан. Эндээс сурагчид бие биенийхээ нүүр рүү харж ярилцан, асуудалд дүн шинжилгээ хийхэд суралцаж байна. Япон улс руу явж туршлага судалснаар олж авсан мэдлэгээ илүү их баяжуулсан. Сурагчдаа багаас нь амьдралд бэлтгэж, өөр өөрийгөө илэрхийлэх чадвараас эхлээд олон төрлийн чадварыг эзэмшүүлэх нь энэ арга зүйн үр дүн юм.
Мэдээллийн төв
