Нийгмийн үзүүлэлтийн түүвэр судалгааны баг Орхон аймагт ажиллаж байна
Орон даяар өрнөж буй өрхөд суурилсан Нийгмийн үзүүлэлтийн түүвэр судалгааны баг Орхон аймагт ажиллахаар ирлээ. Үндэсний Статистикийн Хороо нь Статистикийн тухай хуульд заасны дагуу уг судалгааг НҮБ-ын Хүүхдийн Сан, НҮБ-ын Хүн амын сантай хамтран гурав дахь удаа зохион байгуулж байна. Судалгааны мэдээлэл цуглуулалт өнгөрсөн аравдугаар сарын 4-нд эхэлсэн бөгөөд ирэх арванхоёрдугаар сарын 31 хүртэл улс орон даяар үргэлжлэх юм.
Манай аймагт найман хүний бүрэлдэхүүнтэй ажиллах судалгааны баг 17 багийн санамсаргүй түүврийн аргаар сонгогдсон 425 өрхөөс мэдээлэл цуглуулна. Тодруулбал, нэг багаас санамсаргүй түүврийн аргаар сонгогдсон 25 өрхөөс судалгаа авах юм. Иймд сонгогдсон өрхийн гишүүдийг үүргээ ухамсарлан судалгаанд идэвхтэй оролцож, хамтран ажиллахыг судалгааны багийн ахлагч Б.Даваахүү уриаллаа.
Энэ удаагийн судалгаанд улсын хэмжээнд санамсаргүй түүврийн аргаар сонгогдсон нийт 13850 өрх хамрагдна. Улаанбаатар хотоос 3400 өрх, төвийн бүсээс 2800 өрх, хангайн бүсээс 3025 өрх, зүүн бүсээс 2100 өрх, баруун бүсээс 2525 өрхийг хамруулна.
Судалгаагаар Монгол Улсын хүүхдүүдийн эрүүл мэнд, боловсрол, хоол тэжээл, хөгжил, хамгааллын үзүүлэлтүүд, эмэгтэйчүүд, эрэгтэйчүүдийн мэдээллийн технологийн хэрэглээ, түүний ур чадвар, нөхөн үржихүйн эрүүл мэнд, ХДХВ-ийн талаарх мэдлэг, хүн амын сайжруулсан ундны ус, ариун цэврийн байгууламжийн хэрэглээний хүрээнд мэдээлэл цуглуулна.
Мөн өрхийн ундны усанд гэдэсний савханцар илрүүлэх шинжилгээ, өрхийн эрчим хүчний хэрэглээ зэрэг өрх, хүн амын амьдралын нөхцөл байдал, эрхийн хэрэгжилтийг хэмжих 270 гаруй үзүүлэлт тооцох мэдээлэл цуглуулах юм.
Ингэснээр Тогтвортой Хөгжлийн Зорилтын шалгуур үзүүлэлтүүдийг тооцоход чухал ач холбогдолтой гэлээ. Мөн хүүхдийн хөдөлмөр эрхлэлт, үйлдлийн чадварын алдагдал, сурах суурь чадвар, сэтгэл зүйн байдал, эрэгтэй, эмэгтэй хүмүүсийн согтууруулах ундаа, тамхины хэрэглээ болон бэлгийн харилцааны төлөвшил зэрэг олон талт нийгмийн үзүүлэлтүүдийг уялдуулан судлах юм байна.
Мэдээллийн төв
