Уртын гол багт баригдаж буй орон сууцны эхний ээлжинд ашиглалтад орж буй 77 байрны цахим бүртгэл даваа гаригт буюу 2023.07.24-ны 09:00 цагт эхэлж 26-ны 09:00 цагт хаагдана.  Бүртгэлийг SMART ERDENET  гар утасны аппликейшн www.smarterdenet.mn      вэб сайтаар бүртгэнэ. Тодруулбал, Google form-оор асуулга тус бүрээр материалаа оруулж илгээснээр тухайн иргэний бүртгүүлсэн гар утасны дугаарт бүртгэл баталгаажсан эсэх зурвас очихын зэрэгцээ бүртгүүлсэн цаг, минут, секунт нь харагдах юм.

Баримт материалын бүрдүүлэлтдээ хянамгай хандахыг  иргэддээ зөвлөж байна. Учир нь дутуу болон алдаатай мэдээлэл  оруулсан тохиолдолд нөхөж эсвэл засах боломжгүй гэдгийг анхаарна уу.  Нэг айл өрх нь нэг л орон сууцны байранд материалаа бүрдүүлж өгнө. 
Гараар бичсэн өргөдөл хүлээн авахгүй нэгдсэн загвар бүхий өргөдлийн маягт бөглөх шаардлагатай.

ӨРГӨДЛИЙН МАЯГТ ТАТАХ  /Дарж татаж авна уу/

Иргэд орон сууц худалдан авах хүсэлтээ маягтын дагуу гаргана.

Орон сууц байр худалдан авахад тавигдах шаардлага. 
•  Орон сууцны  байр худалдан авах хүсэлт гаргасан айл өрх нь улсаас орон сууцны байр хувьчилж аваагүй байх, 
•   Орон сууц худалдан авах хүсэлт гаргасан айл өрх нь өмнө нь төрөөс хөнгөлөлттэй нөхцөлөөр олгох түрээсийн болон бусад орон сууцны хөнгөлөлт эдлээгүй байх, 
•  Орон сууцны байр худалдан авах айл өрх нь өөрийн өмчлөлийн инженерийн шугам хангамжгүй байх  /Эрдэнэт-Ус ДТС ОНӨХК/-аас авна. 
•  Сүүлийн 5 жилд гэр хороололд амьдарсан  байх,
•    Худалдан борлуулах байрны төлбөрийг 100 хувь төлөх санхүүгийн эх үүсвэртэй байх

Орон сууцны байр худалдан авах айл өрхийн бүрдүүлэх бичиг баримт:
• Иргэний үнэмлэхний лавлагаа /ТҮЦ машин болон E-Mongolia app, web сайтаас гэр бүлийн гишүүний хамт/
•  Оршин суугаа газрын лавлагаа /ТҮЦ машинаас  болон E-Mongolia app, web  сайтаас  гэр бүлийн гишүүний хамт/
• Ам бүлийн тодорхойлолт багаас /гэр бүлийн гишүүний хамт/
•  Гэрлэлтийн лавлагаа /ТҮЦ машинаас болон E-Mongolia app, web  сайтаас  /
•  Нэг айл өрх нь нэг л орон сууцны байранд материалаа бүрдүүлж өгнө. 
•   Үл хөдлөх хөрөнгийн түүхчилсэн лавлагаа. /Улсын бүртгэлийн хэлтсээс биечлэн авна/

Дашрамд сануулахад, гэр хорооллын бүх багууд дээр Иргэний цахим булан ажиллаж байгаа учир багаасаа E-Mongolia лавлагаа, тодорхойлолт  авах боломжтой.

Иргэдэд худалдан борлуулах 186 айлын орон сууцнаас эхний ээлжийн хоёр блок буюу 104  айлын орон сууцанд  баяр наадмын өмнө буюу долоодугаар сарын 7-нд  улсын комисс ажилласан.  Аймгийн ИТХ-ын тогтоолын хэрэгжилтийг хангаж нэг өрөө нэг байрыг дэлхийн шатрын аварга Б.Мөнгөнзулд, хоёр өрөө нэг байрыг Улсын начин Ө.Батзулд олгох бол 25 айлын орон сууцны  байрыг гэр хорооллын дахин төлөвлөн барилгажуулах төсөлд хамрагдсан айл өрхийг түр суурьшуулах юм.  

Ингээд үлдсэн 77 айлын орон сууцыг иргэдэд 100 хувийн төлөлттэй нөхцөлөөр худалдан борлуулна.

260  айлын орон сууцны  186 айлын орон сууцны байрыг иргэдэд худалдан борлуулж, орлогыг орон нутгийн төсөвт төвлөрүүлэх аймгийн ИТХ-ын тогтоол 2022 оны арванхоёрдугаар сарын 02-ны өдөр гарсан.  260 айлын орон сууцнаас  70 айлын орон сууцны байрыг гэр хорооллын дахин төлөвлөн барилгажуулах төсөлд хамрагдсан айл өрхийг түр суурьшуулах бол нэг өрөө нэг байрыг дэлхийн шатрын аварга Б.Мөнгөнзулд, хоёр өрөө нэг байрыг Улсын начин Ө.Батзул нарт олгохоор уг тогтоолд тусгасан билээ.

Аймгийн ИТХ-ын 2022 оны арванхоёрдугаар сарын 22-ны өдрийн  тогтоолоор тус байрны нэг метр квадрат үнийг 1.952.798 /нэг сая есөн зуун тавин хоёр мянга долоон зуун ерэн найм/ төгрөг, нэг автомашины зогсоолыг 21 сая 380 мянган төгрөгөөр худалдан борлуулахаар шийдвэрлэсэн.  

Эхний ээлжийн 77 байрыг  шаардлага хангасан иргэдэд 100 хувийн төлөлтөөр худалдан борлуулж байгаа нь үлдсэн гурван орон сууцны барилгыг энэ ондоо багтаан ашиглалтад оруулах төсөв санхүүг шийдвэрлэх юм. Учир нь  төрийн хэмнэлтийн тухай  хуультай холбоотойгоор орон нутгийн төсвөөс уг бүтээн байгуулалтыг санхүүжүүлэх боломжгүй болсонтой холбоотой.

Мэдээллийн төв