Монгол Улсад хамгийн анхны алсын зайн оношилгоо, эмчилгээний төвийг аймгийн БОЭТ-д байгууллаа
Орхон аймгийн эрүүл мэндийн салбар энэ жил БНСУ-ын Дэгү, Пусан хоттой гадаад хамтын харилцаагаа өргөжүүлсэн. Өнгөрсөн тавдугаар сард аймгийн Засаг дарга С.Батжаргал тэргүүтэй эрүүл мэндийн салбарын төлөөллүүд дээрх хотын эрүүл мэндийн салбартай хамтран ажиллах санамж бичгийг үзэглэсэн билээ.
Энэ хүрээнд өнөөдөр манай аймагт БНСУ-ын Бусан хотын Үндэсний их сургуулийн эмнэлгийн Гадаад харилцааны хэлтсийн дарга доктор, профессор Ли Жон Кю, Нэгжийн хэлстийн дарга Но Жи Мёон нар зочилж,аймгийн удирдлагуудтай хамтын ажиллагааны талаар санал солилцов. Мөн аймгийн БОЭТ-ийн үйл ажиллагаатай танилцан, ЭМГ-тай хамтын ажиллагааны санамж бичигт гарын үсэг зурлаа.
Аймгийн ЭМГ, БНСУ-ын Бусан хотын Үндэсний их сургуулийн эмнэлэг хоорондын хамтын ажиллагааны хүрээнд БНСУ-д аймгийн эмч, эмнэлгийн ажилтнуудын мэргэжил арга зүйг чадавхижуулах, хэлний мэдлэгийг дээшлүүлэх сургалтад хамруулах, Орхон аймагт Бусан хотын Үндэсний их сургуулийн эмнэлгийн эмч нар сайн дурын үзлэг оношилгоо зохион байгуулах, жилдээ нэг удаа Монгол Улсад эмчлэх боломжгүй хүнд өвчтэй Орхон аймгийн нэг иргэний мэс заслыг БНСУ-д үнэ төлбөргүй хийх гээд олон боломж нээгдэж байна.
Түүнчлэн Монгол Улсад анх удаа тэр дундаа Орхон аймгийн БОЭТ-д алсын зайн оношилгоо, эмчилгээний төвийг байгууллаа.
Алсын зайн эмчилгээ, оношилгооны төвтэй болсноор Бусан хотын Үндэсний их сургуулийн эмнэлгийн эмч нартай зайнаас холбогдож онош тодорхойгүй өвчтөний оношийг цаг алдалгүй тодорхойлох, эмчилгээний дараах хяналтад заавар, зөвлөгөө авах боломжтой болж байна.
БНСУ-ын Бусан хотын Үндэсний их сургуулийн эмнэлэг Монгол Улстай 2015 оноос хойш эрүүл мэндийн салбарт хамтран ажиллаж байгаа ч орон нутгийн төвшинд хамтын ажиллагаа эхлүүлсэн анхны аймаг нь Орхон аймаг, Эрдэнэт хот болж байна. Тус эмнэлгийн гадаад харилцааны хэлтсийн дарга доктор, профессор Ли Жон Кю Орхон аймагтаа эхлүүлсэн хамтын ажиллагаагаа үр дүнтэй байлгахад бүхий л талаар дэмжиж, туслахаа илэрхийлсэн юм.
Бусан хот нь гурван сая 500 мянган хүн амтай Сөүлийн дараа ордог хот. Хотын нийт хүн амын 20 хувь нь 65-аас дээш насны хүмүүс эзэлдэг учир эмчилгээ, үйлчилгээний чанар, хүртээмж хамгийн сайн хөгжсөн хот ажээ.
Аймаг орон нутгаас сүүлийн жилүүдэд эрүүл мэндийн салбартаа хийх хөрөнгө оруулалтаа нэмэгдүүлж буй. Жилд дунджаар 150 мянган иргэнд эрүүл мэндийн тусламж үйлчилгээ үзүүлдэг БОЭТ-дөө тулгуурлан эрүүл мэндийн дотоодын аялал жуулчлалыг хөгжүүлэх зорилтыг тавин ажиллаж байна.
Мэдээллийн төв
