М.Мөнхбаяр:Унаач хүүхдийн аюулгүй байдалд онцгой анхаарна
Монголын тулгар төрийн 2232, Их Монгол улсын 817, Ардын хувьсгалын 102жил Үндэсний их баяр, Орхон аймаг, Эрдэнэт хот байгуулагдсаны 47 жилийн баяр наадмыг ирэх сарын 10,11-ний өдрүүдэд тэмдэглэнэ. Үндэсний их баяр наадмыг зохион байгуулах Засаг даргын А/480 тоот захирамж энэ сарын 16-нд гарч, захирамжаар найман салбар комисс байгуулагдсан билээ.
Хурдан морины комиссын дарга Орхон аймгийн ЗДТГ-ын Хууль, эрх зүйн хэлтсийн дарга М.Мөнхбаяраас бэлтгэл ажил, зохион байгуулалтын талаар дараах мэдээллийг тодрууллаа. Тэрээр, “2022 онд батлагдсан Үндэсний их баяр наадмын тухай хуульд нийцүүлэн монгол морьдын зургаан насны уралдааныг зохион байгуулна. Аймгийн Морин спортын уяачдын холбооноос хүсэлт гаргасны дагуу наадмын урд өдөр буюу 9-нд сонгомол 3 насны морины уралдааныг зохион байгуулна.
Хурдан морины замын асуудал бэрхшээлтэй байдаг үүнийг шийдэхээр Булган аймгийн Бугат сумын удирдлагуудтай ярилцаж байна. Бороо, ус ихтэй байвал энэ замаар уралдах боломжгүй. Тиймээс дотоод нөөц бололцоогоо ашиглан "Эрдэнэт үйлдвэр" ТӨҮГ-тай замыг засахаар төлөвлөсөн. Мөн аймгийн Гэр бүл хүүхэд залуучуудын газартай хамтран унаач хүүхдий аюулгүй байдалд онцгой анхаарч байна” гэлээ.
Мэдээллийн төв
