Орхон аймгийн сувилагч, мэргэжилтнүүд туршлага судлахаар БНХАУ-г зорино
Өнөөдөр Орхон аймгийн эрүүл мэндийн салбарын сувилагч, тусгай мэргэжилтнүүд “Олон улсын сувилагчдын эрхийг хамгаалах өдөр”-ийн баярын хурлаа “Бидний сувилагч- Бидний ирээдүй” уриан дор зохион байгууллаа.
Баярын хурлыг нээж аймгийн эрүүл мэндийн газрын дарга Д.Сүхээ үг хэлж, УИХ-ын гишүүн Д.Батлут, ИТХ-ын дарга Д.Мөнхбат, Засаг дарга С.Батжаргал нар мэндчилгээ дэвшүүллээ. Аймгийн Засаг дарга С.Батжаргал хэлсэн үгэндээ: “Цаашид сувилагч нарын ажлын ачааллыг тэнцвэржүүлэхэд шинэ дэвшилтэт технологуудыг нэвтрүүлэхэд дэмжлэг үзүүлж, сувилахуйн тусламж үйлчилгээг хөгжүүлэхэд орон нутгаас анхаарч ажиллана” гэв.
Орхон аймгийн эрүүл мэндийн салбарт улс болон хувийн хэвшлийн 180 байгууллагат нийт 600 гаруй сувилагч, эмнэлгийн тусгай мэргэжилтэн ажилладаг. Тэдгээр сувилагчдын нийгмийн асуудлыг шийдвэрлэх, дэмжлэг үзүүлэх, олон улсад туршлага судлах зэрэгт дэмжлэг үзүүлэх зорилгоор аймгийн хэмжээнд “Эмч” хөтөлбөр хэрэгждэг.
Хөтөлбөрийн хүрээнд аймгийн Засаг даргын дэмжлэгээр 10 сувилагч, тусгай мэргэжилтэнг БНХАУ-ын Ордос хотод туршлага судлуулахаар баярын хурлын үеэр эрхийн бичгийг гардуулан өглөө.
Түүнчлэн төрийн одон медаль салбарын шагнал болон аймаг орон нутгийн шагналаар олон жил үр бүтээлтэй ажиллаж эрүүл мэндийн салбарт хувь нэмрээ оруулж яваа зарим сувилагч, тусгай мэргэжилтнүүдийг шагнаж урамшууллаа.
Мэдээллийн төв
