Жил бүрийн тавдугаар сарын эхний долоо хоногийн бямба гаригт “Бүх нийтээр мод тарих” үндэсний өдөр тохиодог. Энэ жил төр, хувийн хэвшил, иргэдийн оролцоотойгоор  Орхончууд 1200 га талбайд 4,7 сая мод тарина.

Орхон аймаг “Тэр бум мод” үндэсний хөдөлгөөн, “Ногоон Эрдэнэт” хөтөлбөрийн хүрээнд өнгөрсөн жилийн хавар  долоон байршилд мод тарих ажлыг олон нийтийн оролцоотойгоор зохион байгуулж,  тарьсан модны амьдралын хувь 80,3 гэж үнэлэгдсэн.

Мод тарих үндэсний өдрийг угтан энэ сарын 10-наас А.Амарын талбайд 27 нэр төрлийн 500 гаруй  тарьц, суулгацын үзэсгэлэн худалдаа гарах тул иргэн таныг гэр бүл, найз нөхөд, хамт олноороо мод тарьж, тарьсан модоо ургуулахыг уриалж байна.

    ААНБ-ууд хуваарийн дагуу төлөвлөгөөгөөр баталсан хэсгүүдэд мод тарих бол иргэд “Гэр бүлийн ойн” төгөлд энэ сарын 10-нээс эхлэн гэр бүл, найз нөхдөөрөө мод тарих боломжтой. Өнгөрсөн хавар аймгийн Засаг даргын захирамжаар Баян-Өндөр хайрханы бэл Хүрэнбулагийн аманд “Гэр бүлийн ойн төгөл”-ийг байгуулсан билээ.  Ингэхдээ иргэд өөрсдөө тарьц суулгацаа худалдаж  аван “Гэр бүлийн ойн төгөл”-ийн заасан талбайд  нүхээ ухан тарьцаа суулгах юм.  Харин аймгийн БОАЖ-ын  газраас хар шороо, усалгааг хариуцна.

Аймгийн ИТХ-ын хуралдаанаар батлуулан хэрэгжүүлж буй “Ногоон Эрдэнэт” хөтөбөрт айл,өрх бүр хашаандаа 5 ширхэг мод тарихаар тусгасан. Энэ ажлыг идэвхжүүлэх зорилгоор Засаг даргын захирамжаар “Ногоон Эрдэнэт” болзолт уралдааныг өнгөрсөн жилээс зарласан билээ. Уг болзолт уралдаанд идэвхтэй оролцож ховор мод тарин түүнийгээ амжилттай ургуулсан иргэдийг  “Бүх нийтээр мод тарих” үндэсний өдрийг угтан шагнаж урамшуулна.

Энэ хаврын бүх нийтээр мод тарих ажлын хүрээнд....

•  Жаргалант сумын Хонгор морьтын амын ойн санд 48 га талбайд 110 мянган ширхэг мод тарина.
• Ойг нөхөн сэргээх төслийг хэрэгжүүлэхээр олон улсын байгууллагатай хамтран ажиллаж байна. Хөшөөтийн даваанаас Гурван замын уулзвар хүртэл авто зам дагуу 476 мянган ширхэг мод тарина. 
• Согоот уулын ойн санд 605 мянган ширхэг мод, 
• Говилын төмөр замын гарамнаас Хангал гол дагуу 40 га-д 3 сая мод, 
• Газар  тариалангийн хөрс хамгаалах, ойн зурвас 18,2 мянган ширхэг модыг “Эрдэнэт үйлдвэр” ТӨҮГ, 
• Хаягдлын далан орчим, цагаан тоосны дэгдэлтийг сааруулах ойн зурвас үргэлжлүүлэн байгуулах ажилд 500 мянган ширхэг модыг мөн Эрдэнэт үйлдвэр ТӨҮГ-тай хамтран хэрэгжүүлнэ. 
• Хот орчимд  ногоон төгөл  бий болгох зорилтын хүрээнд Гурван зам, Тарлан толгой, Сархиа уул орчмын 15 га талбайд 2500 ширхэг мод тарихаар төлөвлөжээ. Ингэснээр 2023 онд  нийтдээ 1200 га талбайд 4.7 сая ширхэг модыг хаврын тариалалтаар төр, хувийн хэвшил иргэдийн оролцоотой тарина. 

Орхон аймаг тэрбум мод үндэсний хөдөлгөөний хүрээнд 20 сая мод тарина. Үүний 20 хувийн тарьц суулгацыг аймгийн Сум дундын ойн ангийн мод үржүүлгийн газраас хангах зорилт тавиад буй.  Аймгийн ойн санг нэмэгдүүлэх зорилгоор үйл ажиллагаа явуулдаг Сум дундын ойн ангийн мод үржүүлгийн газар нь 3,5га талбай, 6*20 хэмжээтэй 11 хүлэмжид 11 төрлийн мод бут тарьж, ургуулж байна.   Жилдээ 50,000 ширхэг тарьц суулгац гаргадаг байсан бол өнгөрсөн жил бүтэц орон тоогоо нэмэгдүүлсэнээр тарьц суулгацын хэмжээ 150- 200 мянгад  хүрчээ.  

Мэдээллийн төв