ХББЗА-аас гэрээ байгуулж хяналт хийж байгаа нийт 133 ажил байна
Орхон аймаг 2023 оны хөрөнгө оруулалт, бүтээн байгуулалт, бараа ажил үйлчилгээнд нийт 73 тэрбум төгрөг төсөвлөсөн бөгөөд аймгийн ХББЗА-аас гэрээ байгуулж хяналт хийж байгаа 133 ажил байна.
Үүнээс: Инженерийн Шугам Сүлжээний ажил 12, гэрэлтүүлэг цахилгааны ажил 22, барилга шинээр барих ажил 6, авто замын засвар, зогсоол шинээр барих ажил 32, амралт чөлөөт цагийн талбай, орчны тохижилт 19, жишиг гудамжны тохижилт 9, барилгын засвар болон бусад 33 ажил хийгдэх ажээ.
ХББЗА-ны хариуцан хянаж байгаа хөрөнгө оруулалтын нийт ажлын 83% нь энэ дөрөв дүгээр сар болон тав дугаар сард эхлэх бөгөөд он гарснаас хойш 4 ажил эхлээд байна. Тодруулбал: Баян-Өндөр сумын 6 дугаар бичил хорооллын уулзвараас Их залуу багийн уулзвар хүртэлх А1002 дугаартай улсын чанартай авто замыг 4 эгнээ болгож өргөтгөн шинэчлэх ажлын инженерийн нарийвчилсан зураг төсөл, Даваат багийн 280 хүүхдийн сургууль, цэцэрлэгийн цогцолбор барилгад гарсан эвдрэл, гэмтлийг засварлах ажил, Согоот багийн нутаг дэвсгэрийн орчныг сайжруулах тохижилтын зураг төсөл боловсруулах, Яргуйт багт гэрэлтүүлэг шинээр хийх зэрэг ажлууд эхэлжээ.
Түүнчлэн энэ онд он дамжин хийгдэх нийт 43 ажил үргэлжлэн хийгдэнэ. Өнөөдрийн байдлаар 10 ажил эхэлсэн байна. 2023 онд улсын төсвийн хөрөнгө оруулалтаар шинээр эхлэх ажил байхгүй. Орон нутгийн хөрөнгө оруулалтаар 92, Баян-Өндөр сумын ОНХС-аар 29, Жаргалант сумын ОНХС-аар 12 ажил тус тус хийгдэх талаар аймгийн Засаг даргын шуурхай зөвлөгний үеэр ХББЗА-аас танилцууллаа.
Мэдээллийн төв
