Жаргалант суманд хайгуулын тусгай зөвшөөрөл олгохгүй байхаар шийдвэрлэлээ
Аймгийн ИТХ-ын ээлжит бус VIII хуралдаан цахимаар хуралдаж Ашигт малтмалын хайгуулын тусгай зөвшөөрлийг сонгон шалгаруулалтаар олгох боломжтой эсэхэд санал өгөх тухай асуудлыг хэлэлцлээ.
Ашигт малтмал, газрын тосны газраас Жаргалант сумын нутаг дэвсгэр 346,64 га талбайд ашигт малтмалын хайгуулын тусгай зөвшөөрлийг сонгон шалгаруулалтаар олгох боломжтой эсэх талаар санал авах мэдэгдлийг ирүүлсэн.
Уг асуудлыг холбогдох хуулийн хугацаанд багтаан сумын болон аймгийн ИТХ-ын хуралдаанаар хэлэлцэв. Тодруулбал, Ашигт малтмалын тухай хуулийн 17 дугаар зүйлийн 17.2-т зааснаар аймаг, нийслэлийн Засаг дарга энэ хуулийн 17.1-д заасан мэдэгдлийг хүлээн авмагц тухайн талбай байрших сум, дүүргийн ИТХ болон аймаг, нийслэлийн ИТХ-ын тэргүүлэгчдийн саналыг авч, 45 хоногийн дотор хариу өгөх хуулийн заалттай.
Тухайн асуудлаар Жаргалант сумын ИТХ хуралдаж хайгуулын тусгай зөвшөөрлийг олгох боломжгүй гэх шийдвэрийг гаргасан.
Аймгийн ИТХ-ын ээлжит бус VIII хуралдаанаар ч мөн адил Жаргалант сумын нутаг дэвсгэрт 346,64 га талбайд хайгуулын тусгай зөвшөөрөл олгохыг төлөөлөгчдийн 100 хувийн саналаар дэмжсэнгүй. Учир нь Ашигт малтмалын хайгуулын тусгай зөвшөөрөл сонгон шалгаруулалтаар олгох гэж буй талбай нь Жаргалан суманд “Тэрбум” үндэсний хөдөлгөөн, “Ногоон Эрдэнэт” хөтөлбөрийн хүрээнд ойн сан нэмэгдүүлэх, ойжуулалтын ажил зохион байгуулах талбай болон иргэний эзэмшлийн өвөлжөөний газартай давхцаж байгаа юм.
Мэдээллийн төв
