“Өрхийн болон бичил үйлдвэрлэл үйлчилгээг дэмжих хөтөлбөр” батлав
Орхон аймаг “өрхийн болон бичил үйлдвэрлэл үйлчилгээг дэмжих хөтөлбөр”-ийг аймгийн ИТХ-ын хуралдаанаар хэлэлцэн баталлаа.
Өнөөдөр хуралдаж буй аймгийн ИТХ-ын ээлжит 14-р хуралдаанд “өрхийн болон бичил үйлдвэрлэл үйлчилгээг дэмжих хөтөлбөрийг Засаг даргын Тамгын газрын ХБТХОХ-ийн дарга С.Даваадорж танилцууллаа. Тэрээр: “Орхон аймаг 30-аад мянган өрхтэй бөгөөд үүний 3/1 буюу 10 мянган өрх нь бичил бизнес болон халамжаас бусад орлогогүй байна. Аливаа зээл тусламжид ААН, хоршоод хамрагдаж чаддаг бол гэртээ үйлдвэрлэл эрхэлж орлогоо нэмэгдүүлэх боломж тэр бүр өрхийн үйлдвэрлэл эрхлэгчдэд байдаггүй. Иймд бид энэхүү иргэдэд зориулан хөтөлбөр хэрэгжүүлэхээр боловсруулсан” гэв.
Өөрөө өөртөө ажлын байр бий болгож, өрхийн орлогоо нэмэгдүүлэх, ажлын байраа хадгалж үлдэх боломжийг нэмэгдүүлэх санаачилгыг дэмжих нь тус хөтөлбөрийн зорилго ажээ. Ингэхдээ:
- Бизнес эрхлэгчдийн бүртгэлийн систем бий болгох,
- Хөтөлбөрт хамрагдах өрхийн болон бичил үйлдвэрлэл, үйлчилгээ эрхлэгчдийн судалгаа гаргах, мэдээлэл хүргэх, хөтөлбөрт оролцогчдыг чадавхжуулах,
- Бизнес эрхлэгчдэд санхүүжилт олгох, хөнгөлөлттэй нөхцөлөөр ажлын байраар хангах;
- Бизнес эрхлэгчдийн бүтээгдэхүүн, үйлчилгээг зах зээлд нэвтрүүлэхэд дэмжлэг үзүүлэх зэрэг зорилтыг тусгажээ.
Хөтөлбөр 2023- 2026 оныг дуустал хэрэгжих бөгөөд хөтөлбөрийн үр дүнд 250 шинэ ажлын байр бий болно. Мөн 200 өрхийн ажлын байрыг хадгалж, 1000 иргэнд бизнесийн анхан болон дунд шатны зөвлөх үйлчилгээ үзүүлэх, 130 орчим иргэнд мэргэжил олгох юм.
Хөтөлбөрийг боловсруулахдаа аймгийн Баян-Өндөр, Жаргалант сумдын багуудын бичил бизнес, халамжаас бусад орлогогүй 1000 өрхийн дунд судалгаа хийжээ. Судалгааны дүнд 19 хувийнх нь орлого хүрэлцдэг ч хуримтлал үүсгэх боломжгүй, 81 хувийнх нь орлого огт хүрдэггүй байна. Өрхийн бичил бизнес эрхлэгчдийн ур чадварыг судлахад, оёдол 32 хувь, мужаан 7 хувь, гоо сайханч 6 хувь, бусад 34 хувь, ямар нэг ур чадваргүй 21 хувь байна. Нэг өрхөд 3.9 хүн ноогдож байгаагийн зэрэгцээ 60 хувь нь эмэгтэйчүүд байна.
Мэдээллийн төв
