Аймгийн Засаг даргын иргэдийн санал хүсэлтийг сонсч, 2022 оны ажлаа тайлагнах, 2023 онд улс болон орон нутгийн төсвийн хөрөнгө оруулалтаар хийгдэх ажлын мэдээллийг өгөх уулзалт  дөрөв дэхь өдрөө үргэлжилж байна.  2020,2021 онд коронавирус цар тахлын нөхцөл байдлаас шалтгаалан тухайн жилүүдийн үйл ажиллагааныхаа тайланг цахимаар тавьж байсан билээ.  Иргэдтэй уулзаж буй уулзалтад хэлтэс, агентлагийн дарга нар биечлэн оролцож, иргэдэд мэдээлэл өгч байна.

Цагаанчулуут, Рашаант,Уртын гол, Наран, Найрамдал,Чандмань, Согоот, Зэст, Хүрэнбулаг, Их залуу, Баян-Овоот, Яргуйт, Дэнж багийн иргэдтэй уулзсан. 

Иргэд аймгийн удирдлагуудыг  үйл ажиллагааныхаа талаар мэдээлэл өгч, ажлаа тайлагнан уулзаж байгааг сайшаан  орон нутаг, баг, амьдарч буй орчиндоо тулгамдаж буй асуудал, шийдсэн ажлын талаар нэлээдгүй санал, шүүмж хэлж байв.  2022 онд  Засаг дарга С.Батжаргал,  ЗДТГ-ынхан Орхон аймаг, Эрдэнэт хотынхоо инженерийн шугам сүлжээг шинэчилж, хотын газар доорх байгууламжынхаа аюулгүй байдалд томоохон алхмыг эхлүүлсэн.

Мөн хот төлөвлөлтөө эргэн харж барилгажуулах,  дэд бүтэцжүүлэх, дахин төлөвлөлтийг эхлүүлсэн. Дахин төлөвлөлтийн хүрээнд Цагаанчулуут, Уурхайчин, Говил багийн нутаг дэвсгэрт байрлах ашиглагдахгүй болсон барилга, байгууламмжийгг буулган шинээр барих, сул, чөлөөтэй байгаа газарт  дахин төлөвлөлт  эхлүүлснийг иргэд онцолж  байлаа.

Зарим төрийн байгууллагын ажил үйлчилгээнд ч сэтгэл дундуур байгаагаа хэлж байна. Засаг дарга С.Батжаргал иргэн бүрийн гаргасан санал, шүүмжийг бүх шатны төрийн байгууллагууд түүний албан хаагчид анхаарах нь зүйтэйг сануулсан.  Уулзалтад оролцсон иргэдийн зүгээс нийтийн тээврийн хүртээмж, чанар үйлчилгээ, гэрэлтүүлэг, авто зам, инженерийн шугам сүлжээ, БОЭТ,  такси үйлчилгээний үнийн талаарх санал хүсэлт хамгийн ихээр гарч байв.

Иргэдийн зүгээс түгээмэл асууж буй асуултыг тоймлон хүргэе.

БОЭТ-ийн үйл ажиллагааны талаар тус төвийн дарга Ц.Наран-Эрдэнэ дараахь мэдээллийг  өгч байна.

-БОЭТ-ийн цаг товлолттой холбоотой асуудал иргэдийг хамгийн ихээр бухимдуулдаг асуудал байсан.  Өмнө нь нэг үүрэн телефоны утсаар  иргэдэд цаг олгодог байсан бол одоо И-Монголиа цахим веб, Эрүүл мэндийг дэмжих төвийн 1800-0119 дугаарын утсанд иргэд хандах боломжтой. Өмнө нь нэг ажилтан цаг товлолт дээр суудаг байсныг   тав болгон нэмэгдүүлсэн. Ингэхдээ хоёр  нь биечлэн ирсэн иргэдэд үйлчилгээ үзүүлж байна.

  Өмнөх жилүүдэд 160 мянган хүн амд 25 кабинет эрүүл мэндийн тусламж үйлчилгээ үзүүлдэг байв. Эрүүл мэндийг дэмжих төв ашиглалтад орсноор 40 кабинет иргэдэд үйлчилгээ үзүүлж байна.  Мөн 2023 он гарснаар БОЭТ уламжлалт зүйлсийг халж, үйл ажиллагаагаа шинэчилсний нэг нь лабораторийн үйлчилгээ юм. Энэ сараас лабораторийн цагт өөрчлөлт оруулж 17:00-19:00 цаг хүртэл үйлчилж эхэлсэн. Өнгөрсөн хугацаанд улс болон орон нутгийн төсвийн хөрөнгө оруулалтаар нэлээдгүй хөрөнгө оруулалтыг хийсэн. 2020 онд БОЭТ 700 гаруй нэр төрлийн тоног төхөөрөмжтэй байсан бол 2022 онд 1200 орчим тоног төхөөрөмжтэй болсон.  Энэ хэрээрээ эмнэлгийн тусламж үйлчилгээг сайжруулж 100 орчим шинэ төрлийн хагалгаа, эмчилгээг орон нутагтаа нэвтрүүлэв. 2020 онд 1500-2000 орчим иргэнээ Улаанбаатар хот руу илгээдэг байсан бол 2022 онд 800 болж буурсан нь эрүүл мэндийн тусламж үйлчилгээг орон нутагтаа төвлөрүүлсний үр дүн юм.

Такси үйлчилгээний үнэ тарифын талаар...

-Баян-Өндөр сум дотор такси үйлчилгээнд холбогдох хуулийн хүрээнд гэрээ байгуулсан 3 аж ахуйн нэгжийн 160 орчим такси үйлчилгээнд явж байна.  Шатах, тослох материалын үнэ тариф удаа дараа нэмэгдсэнтэй холбогдуулан зорчигчийн шинэчилсэн үнэ тарифыг 2022 оны  дөрөвдүгээр сарын 14-нд байгуулсан "Хотын доторх такси үйлчилгээг зохион байгуулах, гүйцэтгэх гэрээ"-нд тусган үйлчилгээнд мөрдүүлж буй.

 Тус гэрээнд "Такси үйлчилгээний үнэ тариф хотын дотор эхний 1 км дотор 1500 төгрөг, түүнээс цааших 1 км тутамд 1000 төгрөг буюу 100 м тутамд 100 төгрөг, Вокзалын чиглэлд нэг зорчигчийг 2000 төгрөг байхаар тусган мөрдөж байна.

Гэрэлтүүлгийн талаар...

-Гэр хорооллын 60 хувийн асалттай байсан гэрэлтүүлгийг 85-90 хувьд хүргэсэн. Орон нутгийн төсвийн нэг тэрбум 300 сая төгрөгийн хөрөнгө оруулалтар 13 багийн гэрэлтүүлгийн тэжээлийн блок, толгой, кабель солих ажлыг гүйцэтгэсэн. Энэ онд авто зам дагуух болон орон сууцны хорооллын гэрэлтүүлгийг шинэчилнэ.    Гэр хорооллын гэрэлтүүлэг нэг дор 100 хувь асна гэж ойлгох нь өрөөсгөл ойлголт юм. Нөхөлт үйлчилгээ хийгээд 70 хувийн асалттай байсан хэсгийг 75,80 хувийн асалттай болгоход өнөөдөр унтраагүй гэрлийн асалтын хугацаа маргааш дуусч  асахгүй байх магадлалтай. Гэр хорооллын 6 мянган гэрлийг нэг дор хийгээгүй учраас шатна, түүнийг нь нөхөлт хийгээд явах процесс байнга давтагдана гэх тайлбарыг мэргэжлийн байгууллагаас өгч байна.   Тухайн гэрлийг хийсэн он буюу ашиглалтын хугацаатай холбоотой гэнэ. Жилд нэг багт 50 гэрэл шинээр нэмэгддэг, дараа жил мөн тооны гэрэл нэмэгддэг учраас хугацаа нь өөр. Ашиглалтын хугацаанаас хамааран гэмтэл үүсдэг, мөн аянга цахилгаан, шон мөргөх зэрэг гадны нөлөөтэй гэмтлээс үүдэлтэйгээр асахгүй байх тохиолдол их байна. Нэг шонгийн гэрэл шатлаа гэхэд багадаа 30 гэрэл дагаж унтардаг.

 Харин төв зам дагуух гэрэлтүүлгийн  кабелийн утас бүгд газар дор. Кабелийн утасны  насжилт 10-аас дээш жил болсон, хоёр шонгийн хооронд 40-50 метрийн зайтай байдаг ажээ. Өнөөдрийн байдлаар  кабелийн утаснууд багадаа 2-3 залгаа орсон, ихээр орсон борооны ус нэвчиж кабель гэмтэх тохиолдол их гардаг.  Хоёр шон дээр гэмтэл гарлаа гэхэд бусад шонд гэмтэл гарахгүй байх үүднээс удирдлагын систем автоматаар ажиллаж тухайн хэсгийн бүх гэрэл унтардаг байна. Гэмтэл гарсан тохиолдолд тухай бүрт нь засварын ажлыг гүйцэтгэж асалтыг хэвийн горимд шилжүүлдэг талаар хэллээ.

Нийтийн тээврийн чанар, хүртээмжтэй холбоотой асуудлаар....

-Өнөөдрийн  байдлаар манай аймагт нийтийн тээврийн үйлчилгээнд хоёр компанийн 34 автобус 18 багийн нутаг дэвсгэрийг хамран иргэдэд үйлчилж байна.  2020-2024 он хүртэл аймгийг хөгжүүлэх 5 жилийн үндсэн чиглэл, аймгийн Засаг даргын үйл ажиллагааны хөтөлбөрт иргэд, сурагчдыг ая тухтай аюул осолгүй тээвэрлэх, нийтийн тээврийн үйл ажиллагааг сайжруулахаар тусгасан.

Үүний хүрээнд 2022 онд орон нутгийн төсвийн 2,2 тэрбум төгрөгийн хөрөнгө оруулалтаар нийтийн тээврийн үйлчилгээ болон сурагчды автобусны парк шинэчлэлтэд зориулж тэг гүйдэлтэй 12 ширхэг дунд оврын Hyundai County автобусыг ААНБ-уудад хүлээлгэн өглөө.   Ингэхдээ ББ-Од ХХК-д 5 ширхэг, Тод од транс ХХК-д 4 ширхэг, Автомастер ХХК-д 1 ширхэг автобусыг ашиглуулж, эзэмшүүлэхээр гэрээгээр хүлээлгэн өгсөн бол Жаргалант сумын ахмад настан, сурагчдын автобусыг шинэчлэх ажлын хүрээнд 1 автобус, аймгийн сурагчдын автобусны тоог нэмэгдүүлэх ажлын хүрээнд 1 автобусыг Хот тохижуулах газарт тус тус хүлээлгэн өглөө. Ийнхүү Орхон аймаг, Эрдэнэт хотын нийтийн тээвэр цоо шинэ 10 автобусаар нэмэгдэж, цахим системээр иргэдэд үйлчилж эхэллээ. Уулзалтын үеэр иргэдээс гарсан маршруттай холбоотой санал хүсэлтийг хүлээн авч судлахыг холбогдох байгууллагын удирдлагуудад үүрэг болгов.

Мэдээллийн төв