Аймаг орон нутгийн засаг захиргааны байгууллага “Эрдмин ХХК”-тай 2019 оноос хойш хамтын ажиллагааны гэрээг байгуулж, жил бүр үйл ажиллагааны төлөвлөгөөг баталсаар ирсэн билээ. 
2022 оны хамтын ажиллагааны төлөвлөгөөнд “Эрдмин ХХК” нь байгаль орчин, экологи, боловсрол, хүн амын эрүүл мэндийг хамгаалах, нийгмийн хамгаалал болон бусад чиглэлээр 10 арга хэмжээг тусгаж, амжилттай хэрэгжүүлсэн байна. 
Энэ онд хамтын ажиллагааны төлөвлөгөөнд есөн арга хэмжээг тусгаж хамтран ажиллахаар төлөвлөгөөнд тусгалаа. 
Тухайлбал, "Тэрбум мод" үндэсний хөдөлгөөн, "Ногоон Эрдэнэт" хөтөлбөрийн хүрээнд мод арчилж тарих,  Орхон аймгийн Бүсийн оношилгоо эмчилгээний төвд зайлшгүй шаардлагатай зүрхний холтер аппарат зэрэг тоног төхөөрөмжийг нийлүүлэх,  "Уран эгшиг" сургуульд хөгжмийн зэмсэг авч өгөх, ажлын байр нэмэгдүүлэх, бизнес эрхлэгчдийг дэмжих чиглэлээр хамтран ажиллахаар тусгасан. 

      Засаг дарга С.Батжаргал “ “Эрдмин ХХК” нийгмийн хариуцлагатай өндөр аж ахуйн нэгж юм. Орон нутгийн аж ахуйн нэгж, хувь хүмүүсийг дэмжиж 2022 онд 58 компани, 57 бизнес эрхлэгчдээс нийт нэг тэрбум гаруй төгрөгийн бараа үйлчилгээний худалдан авалтыг хийсэн нь бодит дэмжлэг болж чадсан. Эрүүл мэнд, спорт, боловсролын салбарт түлхүү анхаарч хөрөнгө оруулалт хийдэг нь аймаг орон нутгийн иргэд, хүүхэд залууст ихээхэн хувь нэмэрр болдог” хэмээсэн.

2022 онд   “Зүрх Мартахгүй” төслийн хүрээнд хамтран ажиллаж зүрхний хагалгаанд яаралтай орох шаардлагатай Орхон аймгийн 5 хүүхдийн зардалд 25 сая төгрөгийн санхүүжилтийг шийдвэрлэсэн.  Мөн аймаг орон нутагт зохион байгуулж буй аливаа тэмцээн уралдаан, сургалтад санхүүгийн дэмжлэг үзүүлсээр ирсэн билээ. 

Тэдгээрээс дурьдвал, Монголын мэдээгүйжүүлэгч эмч нарын нийгэмлэгээс БОЭТ-тэй хамтран “Хагалгаа Тойрны Анагаах Ухаан” сэдвийн дор аймгийн эмч нарын дунд зохион байгуулсан чуулга уулзалтын зохион байгуулахад 5 сая төгрөгийн дэмжлэг,  Орхон аймгийн хөлбөмбөгийн холбооны тамирчид болон Хангарьд спорт клубын баг тамирчдыг бэлтгэл хийх, тэмцээн уралдаанд ороход хэрэглэгдэх хувцас хэрэглэлд зориулан 4 сая төгрөгийг зарцуулж, 46 ширхэг 2 ээлжийн ком хувцсаар хангасан билээ. 

Шинэ оны босгон дээр Жаргалант сумын шинээр ашиглалтад орсон Эрүүл мэндийн төвийн өргөтгөлд шаардлагатай 13 сая төгрөгийн 15 нэр төрлийн 39 ширхэг тоног төхөөрөмжийг хүлээлгэн өгсөн гээд гэрээний хүрээнд болон нийгмийн хариуцлагын хүрээнд идэвх санаачилгатай ажиллаж, амжилттай хэрэгжүүлсэн арга хэмжээ нэлээдгүй бий. 

Засаг дарга  С.Батжаргал “Манай аймагт энэ сарын 6-наас 12-ны өдрүүдэд болох Монголын бүх ард түмний спортын өвлийн XVI наадам, Монголын хүүхдийн спортын өвлийн VII наадамд дэмжлэг үзүүлж буй танай хамт олонд талархал илэрхийлье “ гэлээ. 

Мэдээллийн төв