Хөдөө аж ахуйн техникийн үзэсгэлэн худалдаа ирэх дөрөвдүгээр сард болно
Монголдоо анхдагч хөдөө аж ахуйн техникийн үзэсгэлэн худалдааг ирэх дөрөвдүгээр сарын 8,9,10-ны өдрүүдэд “Эм жэй Агритек” ХХК Улаанбаатар хотноо зохион байгуулахаар төлөвлөж байгаа ажээ. Тус компанийн гүйцэтгэх захирал Кимихиро Ито, Накано Кацүя нар өнөөдөр аймгийн Засаг даргын орлогч А.Түвшинжаргалтай уулзлаа.
Япон улсын “Кубота” брэндийн хөдөө аж ахуйн техник хэрэгслийг аймгийн хөдөө аж ахуйн газар тариалан эрхлэгч нарт танилцуулах, сурталчлах зорилготой гэдгээ уулзалтын эхэнд зочид онцлов.
Засаг даргын орлогч А.Түвшинжаргал аймаг, орон нутгийн хөдөө аж ахуйн салбарын талаар мэдээлэл өгсөн. Тэрээр, Орхон аймаг, Эрдэнэт хот газар тариалангийн бүс нутагт хамаардаггүй ч тодорхой хэмжээнд газар тариалан эрхэлдэг. 12 мянган га газарт 4 ААН үр тариа тариалдаг. Харин өрхийн тариаланчид олон бий. Тарилан эрхлэгчид маань шууд худалдан авалт хийхээс илүүтэй хүү богинотой урт хугацааны зээл илүү тааламжтай байх болно” гэлээ.
“Эм жэй Агритек” ХХК нь 2019 онд үүсэн байгуулагдсан бөгөөд Япон улсын “Кубота” брэндийн албан ёсны төлөөлөгч ажээ.
Монгол Улсад төдийгүй аймгийн хөдөө аж ахуйн салбарт хөдөлмөрлөж буй иргэдэд “Кубота” брэндийн том, бага, дунд оврын техник тоног төхөрөмжийг хүнсний ногоо тариаланчид хадланчид, фермерүүдэд зээлийн таатай нөхцлөөр санал болгож байна.
Тариаланчид Та бүхэн ирэх дөрөвдүгээр сарын 8,9,10-ны өдрүүдэд зохион байгуулах Монголдоо анхдагч хөдөө аж ахуйн техникийн үзэсгэлэн худалдаанд оролцож илүү их мэдээлллийг авах боломжтой юм.
Мэдээллийн төв
