Эрт илрүүлэг, үзлэг оношилгоогоор хорт хавдрын 11 тохиолдлыг илрүүлжээ
Засаг даргын орлогч А.Түвшинжаргалаар ахлуулсан ажлын хэсэг өнөөдөр хуралдаж урьдчилан сэргийлэх эрт илрүүлэх үзлэг, шинжилгээ оношилгооны явцын талаарх мэдээлэл болон цаашид авч хэрэгжүүлэх арга хэмжээний талаар санал солилцов. Засгийн газрын шийдвэрээр өнгөрсөн тавдугаар сарын 1-нээс орон даяар Монгол Улсын бүх иргэнийг "Эрт илрүүлэг, урьдчилан сэргийлэх үзлэг, оношилгоо”-нд хамруулах ажлыг эхлүүлсэн. Өнөөдрийн байдлаар улсын хэмжээнд 800 мянга гаруй иргэн хамрагджээ.
Орхон аймгийн хувьд 29 мянга гаруй буюу нийт хүн амын 27,9 хувь нь эрт илрүүлэг үзлэг оношилгоонд хамрагдаж улсын хэмжээнд хоёрт бичигдэж байна.
Хэдийгээр улсын хэмжээнд өндөр үзүүлэлттэй гарч байгаа ч насны ангиллаар нь авч үзвэл 18-39 насныхны эрт илрүүлэг, үзлэг оношилгоо шинжилгээнд хамрагдах идэвх сул байгааг албаныхан хэлсэн. Дээрх насны 1696 иргэн эрт илрүүлэгт хамрагдсан байна.
Хүүхдийн урьдчилан сэргийлэх, эрт илрүүлэг үзлэгийг Өрхийн эрүүл мэндийн төв, сум, тосгоны эрүүл мэндийн төв, насанд хүрэгчид БОЭТ, ЭМДТ, “Эрдэнэт медикал” эмнэлэгт хийж байгаа. Цаашид “Баян-Өндөр мед” эмнэлгийг татан оролцуулах талаар хэлэлцэж, бэлтгэл хангахаар болов.
Мөн зарим нэр төрлийн тоног төхөөрөмжид эвдрэл гэмтэл гарсантай холбоотойгоор удааширч байгаа асуудлыг хэрхэн шийдвэрлэх талаар ч ажлын хэсгийн хуралдаанаар яригдлаа. Тухайлбал, “Эрдэнэт медикал” эмнэлэг хоёр дурантайгаас нэгд нь гэмтэл гарсан, Эрүүл мэндийг дэмжих төв мөн адил хоёр дурантайгаас нэг нь эвдэрснээс үүдэн багагүй хүлээлт үүсээд байгаа юм.
“Эрт илрүүлэг, урьдчилан сэргийлэх" үзлэг, оношилгоо улсын хэмжээнд эхэлсэн найман сарын хугацаанд аймгийн хэмжээнд 11 хорт хавдрын тохиолдлыг илрүүлж, дараагийн шатны эмнэлэг рүү илгээжээ. Үүний 10 нь ходоод, улаан хоолойн нэг хорт хавдрын тохиолдол байна. Хорт хавдар, аливаа өвчний хүндрэл үүсэхээс урьдчилан сэргийлэх цорын ганц арга зам нь эрт илрүүлэг, үзлэг оношилгоо юм. Иймд иргэд Та бүхнийг эрт илрүүлэг, үзлэг оношилгоонд идэвхтэй хамрагдахыг уриалж байна.
Засаг даргын орлогч, ажлын хэсгийн ахлагч А.Түвшинжаргал “Төрийн байгууллагын ажилчдыг эрт илрүүлэг үзлэг оношилгоонд хамрагдах идэвхийг эрчимжүүлж, цалинтай чөлөө олгох тухай саналыг төрийн байгууллагын удирдлагуудад тавихаа илэрхийлсэн.
Цаашид 18-34 насны хамрагдалтыг нэмэгдүүлэх, ходоодны дурантай багцын квотыг нэмэгдүүлэх, их дээд сургууль, коллежын оюутнуудыг ЭМД-д хамруулах, иргэдэд урьдчилан сэргийлэх үзлэгийн мэдээ мэдээллийг хүргэхэд анхаарч ажиллахаар боллоо.
Мэдээллийн төв
