Бүх ард түмний спортын өвлийн наадмыг зохион байгуулах ажлын хэсэг хуралдлаа
Монголын бүх ард түмний спортын өвлийн 16 дугаар их наадам, Монголын хүүхдийн спортын өвлийн 7 дугаар наадам хоёрдугаар сарын 8-13-ны өдрүүдэд Орхон аймагт болно.
Засаг даргын орлогч А.Түвшинжаргалаар ахлуулсан ажлын хэсэг өнөөдөр анхны хуралдаанаа хийж, зохион байгуулах хорооны бүрэлдэхүүн, дэд хороодын гишүүд, гүйцэтгэх чиг үүргийн талаар санал солилцлоо.
Монголын бүх ард түмний спортын өвлийн 16 дугаар их наадам, Монголын хүүхдийн спортын өвлийн 7 дугаар наадмыг орон нутагтаа зохион байгуулах эрхийн төлөө Орхон болон Баянхонгор аймаг өрсөлдөж, сонгон шалгаруулалтад оролцсон. Үүний дагуу Биеийн тамир спортын улсын хорооноос ажлын хэсэг 2022 оны аравдугаар сард Орхон аймагт ажиллаж, манай аймгийн өвлийн спортын барилга байгууламж, зам, талбайн орчин, дэд бүцэц, худалдаа, үйлчилгээний байгууллагуудын хүчин чадал зэрэгтэй танилцсан билээ. Ингээд дөрвөн жилд нэг удаа зохион байгуулдаг Улсын өвлийн олимп гэж хэлж болохуйц өвлийн спортын их наамдыг Орхон аймагт зохион байгуулах эрхийг олгосон.
Өнөөдрийн байдлаар спортын наадам зохион байгуулах тэмцээний зам талбайн ажлын явц уулын цана, гүйлтийн цана снөүбордын замын явц 70 хувь, гүйлтийн тэшүүр, шорт трейк уралдааны зам талбай 65 хувь, шайбтай хоккейн зам талбайн явц 90 хувийн гүйцэтгэлтэй байна.
Насанд хүрэгчдийн болон хүүхдийн спортын тус бүр 6 төрөл нийт 12 төрөлд 336 багц медалийн төлөө 21 аймаг, нийслэл, есөн дүүргийн тамирчид өрсөлдөх юм.
Ажлын хэсэг зохион байгуулалт хариуцсан дэд хороо, хэвлэл мэдээлэл, маркетинг, сурталчилгааны дэд хороо, соёл урлаг, шагнал гардуулах дэд хороо, эрүүл мэнд, аврах баг, халдвар хамгааллын дэд хороо зэрэг есөн дэд хорооноос бүрдэж салбар салбарын чиглэлээр төлөвлөгөө гарган ажиллах юм. Мөн өвлийн спортын наадмын үеэр тамирчид, шүүгчид болон гадна, дотнын зочид төлөөлөгчид 2300 орчим хүн ирнэ гэж тооцоолж байна.
Мэдээллийн төв
