Өмнөд дэд станцын өргөтгөл 2023 оны хавар ашиглалтад орно
Даваа гаригийн Засаг даргын шуурхай зөвлөгөөн хуралдаж өнгөрсөн долоо хоногт харьяа байгууллагуудад өгсөн үүрэг даалгаврын биелэлтийг хэлэлцлээ. Шуурхайн эхэнд ТЗУХ-ийн дарга бөгөөд ХШҮХ-ийн даргын албан үүргийг түр орлон гүйцэтгэгч М.Жанболат үүрэг даалгаврын биелэлтийн хэрэгжилтийг танилцуулав.
Өнгөрсөн долоо хоногт Засаг дарга С.Батжаргал "Өмнөдийн дэд станцыг ашиглаж эхлэх талаар онцгой анхаарах" үүргийг холбогдох байгууллагуудад өгсөн.
“Эрдэнэт-Булганы цахилгаан түгээх сүлжээ” ТӨХК-иас 35/6 кВ-ын Өмнөд дэд станцын өргөтгөлийн ажлын барилга угсралтын ажил дууссан. 6к8 талын холболтын ажил нь хэрэглэгчдийн хэрэглээг 6-8 цаг тасалж хийхээр байгаа тул хөлдөлт үүсэх эрсдэлтэй, Эрчим хүчний сайдын А/215 тоот тушаалыг зөрчхөөр байгаа тул халаалтын улирал дуусахаар ашиглалтад оруулах тухай саналыг ирүүлжээ. Мөн гүйцэтгэгч компани нь комиссоос өгсөн зарим үүрэг даалгаврыг дулааны улиралд хийж гүйцэтгэхээ мэдэгдсэн гэх мэдээллийг ирүүлжээ.
Хот байгуулалт, Барилга захиалагчийн албанаас энэ сарын 6-нд ашиглалтад оруулах комисс ажиллаж хүлээн авахаар шийдвэрлэсний дагуу бичиг баримтын бүрдэл хангагдан ашиглагч байгууллага болох “ЭБЦТС” ТӨХК руу бүрэн шилжүүлсэн гэжээ.
Орхон аймаг гэр хорооллын цахилгаан эрчим хүчний найдвартай үйл ажиллагааг дэмжих, эрчим хүчний уналтыг бууруулах, хүчдэлийн алдагдалд оруулахгүй байх зорилгоор Цагаанчулуут багийн нутаг дэвсгэрт дэд станцын өргөтгөлийг 2022 оны орон нутгийн төсвөөр барьж байгуулах ажлыг эхлүүлсэн. Орон нутгийн төсвийн 2,5 тэрбум төгрөгийн өртгөөр 35/6кВ-ын 2*10000 кВа хүчин чадалтай уг дэд станц ашиглалтад орсноор Дэнж, Эрдэнэ Яргуйт, Шанд багийн айл өрхийн цахилгаан эрчим хүч нэмэгдэх юм.
Мэдээллийн төв
