“Орлогод нийцсэн орон сууц” хөтөлбөрийн хүрээнд орон нутгийн санхүүжилтээр Уртын гол багт барьж буй 260 айлын орон сууцны 186-г нь иргэдэд худалдан борлуулах  шийдвэрийг аймгийн ИТХ-ын ээлжит 13 дугаар   хуралдаанаас гаргасан. 

Өнөөдрийн  байдлаар барилгын ажлын явц 90 хувьтай байгаа бөгөөд эхний ээлжинд гурван блок буюу 150 айлын орон сууцыг ашиглалтад оруулахаар зорьж байгаа юм.  
Уг байрыг иргэдэд  худалдан борлуулахтай холбоотой асуудулаар Орхон аймагт үйл ажиллагаа явуулж буй  Хаан, Хас, Төрийн банк, Голомт, Богд зэрэг арилжааны 7 банкны эрхлэгч, Монголбанкны Орхон аймаг дахь салбарын  захирал С.Долгорсүрэн зэрэг албаны хүмүүстэй Засаг даргын орлогч А.Түвшинжаргал, ЗДТГ-ын дарга Ш.Ганболд, Хөгжлийн бодлого төлөвлөлт,  хөрөнгө оруулалтын хэлтсийн дарга С.Даваадорж, Санхүү, төрийн сангийн хэлтсийн дарга Н.Бямбацэцэг нар уулзаж, санал солилцов. 

     Монголбанкны Орхон аймаг дахь салбарын захирал С.Долгорсүрэн “Өнөөдрийн  байдлаар Орхон аймгийн   4200 гаруй иргэн 207,1 тэрбум төгрөгийн ипотекийн  зээлийн үлдэгдэлтэй байна. Үүнийг бусад аймаг орон нутагтай харьцуулбал хамгийн өндөр үзүүлэлт юм. Өөрөөр хэлбэл, Орхон аймагт ипотекийн зээл хамгийн ихээр олгогдож буй аймаг гэж хэлж болно.  Энэ  оны аравдугаар сарын байдлаар орон сууцны  ипотекийн 6 хувийн зээлийг  101 иргэнд  олгосон байна.  Энэ сарын 2-ны өдрийн байдлаар Орхон аймагт 423 иргэн 37,4 тэрбум төгрөгийн ипотекийн зээлийн хүсэлт  гаргасан байна. Зээлийн зөвшөөрөл нь гарсан боловч Монголбанкнаас санхүүжилт нь  орж ирээгүй 48 зээлдэгч байна гэх мэдээллийг өгөв. 

Баян-Өндөр сумын Уртын гол багт баригдаж байгаа 260 айлын орон сууц нь орон нутгийн санхүүжилтээр барьж буй хамгийн анхны бүтээн байгуулалт юм. Цаашлаад  улсын хэмжээнд Орхон аймаг анхлан хэрэгжүүлж буй төсөл. Иргэдээ орлогод нийцсэн орон сууцанд хамруулах алсдаа Орхон аймгийн агаарын бохирдлыг бууруулах томоохон ач холбогдолтой төсөл юм гэдгийг Засаг даргын орлогч А.Түвшинжаргал онцлон хэлсэн. 
     Уртын гол багт баригдаж буй 260 айлын орон сууцны нэг метр квадрат талбайн үнийг нэг сая 952 мянга 798 төгрөг байхаар ИТХ-аар тогтсон.
Орхон аймагт 2020 оноос хойш орон сууцны 41 блок 2368 айл, амины орон сууны 250 блок 400 айлын барилга баригдаж эхэлснээс 27 блок 1745 айлын орон сууц ашиглалтад орсон  байна. Барилгын угсралтын ажил үргэлжилж буй 29 блокийн 1726 айлын орон сууц байна. 

Банкны удирдлагууд “Орлогод нийцсэн орон сууцны төсөл”-ийг дэмжиж ажиллахаа илэрхийлэн дүрэм, журмын дагуу  материалаа бүрдүүлж ипотекийн зээл хүссэн иргэнд зээл олгох боломжтой гэсэн. 
Ипотекийн зээлийн журамд өөрчлөлт оруулахаар ажлын хэсэг гарч Засгийн газрын хуралдаанаар хэлэлцүүлэх бэлтгэл ажлыг хангаж буй. 
Уг журамд урьдчилгаа 30 хувийг 20 хувь болгох, 6 хувийн хүүг тодорхой хугацааны хязгаартайгаар 3 болгож бууруулах гэх мэтчилэн нааштай хэд хэдэн зохицуулалт орж байгаа, шийдэгдэх эсэх Засгийн газрын хуралдааны шийдвэрийг хүлээж байна гэх мэдээллийг өгч байна. 

Хамгийн сүүлд Монголбанкнаас орон сууцны ипотекийн зээлийн журамд зарим өөрчлөлт оруулсан. Тухайлбал, өмнө нь нийт ипотекийн зээлд олгох санхүүжилтийн 60 хувийг  Монголбанкнаас, 40 хувь нь арилжааны банкнаас санхүүждэг байсан бол өнгөрсөн аравдугаар сараас 80 хувь нь Монголбанкнаас 20 хувь нь арилжааны банкнаас санхүүжиж байхаар болсон.  Мөн Монголбанкны эх үүсвэрээр  олгох зээлийн дээд хэмжээг энэ оны аравдугаар сараас Улаанбаатарт 150 сая, орон нутагт 100 саяар тогтоосон билээ. 

Мэдээллийн төв