Хөгжлийн бэрхшээлтэй хүүхдүүд хөгжих, боловсролд тэгш хамрагдах "Хүүхдийн хөгжлийг дэмжих" төвтэй боллоо
Аймгийн ЗДТГ, БШУГ хамтран “Тэгш боломж”, “Хүүхдийн хөгжил”, “Эрдэнэтийн эрүүл хүүхэд” зэрэг төслийг хэрэгжүүлж буй. "Тэгш боломж" төслийн зорилго нь хөгжлийн бэрхшээлтэй хүүхдүүдийг боловсролд, тэгш хамруулах юм. Жил бүрийн арванхоёрдугаар сарын 11-нд тохиодог Эрдэнэт хотын өдөр, Анхдагч илгээлтийн эздийн өдрийг угтан өнөөдөр ерөнхий боловсролын XX сургууль дээр байгуулсан Хөгжлийн бэрхшээлтэй хүүхдийн хөгжлийг дэмжих төвийг багш, эцэг, эхчүүд, хүүхдүүдэд хүлээлгэн өглөө.
Уг арга хэмжээнд Засаг дарга С.Батжаргал, Засаг даргын орлогч А.Түвшинжаргал, ЗДТГ-ын Нийгмийн бодлогын хэлтсийн дарга А.Бумансор болон багш, сурагчид, эцэг эхчүүдийн төлөөлөл оролцлоо. Засаг дарга С.Батжаргал “Ямар нэгэн бэрхшээлээс үл хамааран хүүхэд бүр боловсролын үйлчилгээг, тэгш хүртээмжтэй авах ёстой гэж үзэн “Тэгш боломж” төслийг хэрэгжүүлж эхэлсэн. Төслийн зорилго боловсролын үйлчилгээнд хамрагдаж чадахгүй байгаа хүүхдүүдээ хөгжүүлэх, сургах зорилготой юм” гэлээ.
Аймгийн хэмжээнд ерөнхий боловсролын сургуульд 177, СӨБ-д 30 хүүхэд хамрагдаж байгаа бол боловсролд хамрагдаж чадахгүй гэртээ байгаа 120 хүүхэд байгаа аж. Уг хүүхдүүдийг хөгжүүлэх, боловсролд тэгш хамруулах зорилгоор төслийн хүрээнд I,VII, XX сургууль дээр Хүүхдийн хөгжлийг дэмжих төвийг байгуулаад байна.
Сонсгол болон хараа, оюуны бэрхшээлтэй хүүхдүүд сурч хөгжихөд нь зориулж сүүлийн үеийн тоног төхөөрөмж, сургалтын хэрэглэгдэхүүнээр дээрх гурван төвүүдийг тохижуулахад орон нутгийн төсвийн 120 орчим сая төгрөгийг зарцуулжээ.
Мэдээллийн төв
