ИТХ-ын хуралдаанаар 260 айлын орон сууцны нэг метр квадрат талбайн үнийг нэг сая 952 мянга 798 төгрөг байхаар тогтоолоо
Аймгийн ИТХ-ын ээлжит XIII хуралдаанаар Баян-Өндөр сумын Уртын гол багт баригдаж байгаа орлогод нийцсэн 260 айлын орон сууцыг худалдан борлуулах, гэр хорооллын газрыг дахин төлөвлөн барилгажуулах төсөлд хамрагдсан айл өрхийг түр суурьшуулах харилцааг зохицуулах журамыг баталлаа.
Тус орон сууцны нэг метр квадрат талбайн үнийг нэг сая 952 мянга 798 төгрөгөөр, нэг авто машины зогсоолыг 21 сая 380 мянган төгрөг байхаар тогтоов.
Ингэхдээ 260 айлын орон сууцны 186 байрыг худалдан борлуулж орлогыг орон нутгийн төсөвт төвлөрүүлэх, нэг өрөө нэг байрыг дэлхийн шатрын аварга Б.Мөнгөнзулд, хоёр өрөө нэг байрыг Монгол Улсын начин Ө.Батзулд олгохоор шийдвэрлэв. Мөн 70 айлын орон сууцны байрыг гэр хорооллыг дахин төлөвлөн барилгажуулах төсөлд хамрагдсан айл өрхийг түр дамжин өнгөрүүлэн орон сууцжуулахаар болов.
Орлогод нийцсэн орон сууцыг худалдан авах айл өрхөд
Орон сууцны байр худалдан авах хүсэлт гаргасан айл өрх нь улсаас орон сууцны байр хувьчилж аваагүй байх,
Орон сууц худалдан авах хүсэлт гаргасан айл өрх нь өмнө нь төрөөс хөнгөлөлттэй нөхцлөөр олгох түрээсийн болон бусад орон сууцны хөнгөлөлт эдлээгүй байх,
Сүүлийн 5 жил гэр хороололд амьдарсан байх зэрэг хэд хэдэн шаардлагыг журамд тусгажээ. Журамыг бүрэн эхээр нь эргэн мэдээлэх болно.
Мэдээллийн төв
