“Монгол гэрт зориулсан дулаалга, халаалт, агаар сэлгэлтийн ЧИП багц” төслийн баг Орхон аймагт ажиллаж байна
Монгол гэрийн дулаан алдагдалт, дотор болон гадаад орчны агаарын бохирдлыг бууруулах зорилгоор шийдсэн “Монгол гэрт зориулсан дулаалга, халаалт, агаар сэлгэлтийн ЧИП багц” төсөл Орхон аймагт нэвтэрч байна. Нэгдсэн Үндэстний Байгууллагын Хүүхдийн Сан (НҮБХС)-ийн “Агаарын бохирдлоос эх хүүхдийн эрүүл мэндийг хамгаалах” хөтөлбөрийн хүрээнд 2019 оноос хэрэгжүүлж байгаа төсөл юм.
Төсөл хэрэгжүүлэгч БОАЖЯ, ЗДТГ, Пипл Ин Нийд (ПИН) ОУТББ, НҮБ-ын Хүүхдийн сан зэрэг байгууллагуудын төлөөлөл өнөөдөр Орхон аймагт ирж, аймгийн удирдлагуудтай уулзалт хийлээ. НҮБ-ын Хүүхдийн сан монгол гэрийн дулаан алдагдлыг бууруулж, дотор агаарын бохирдолгүй халаалтын систем нэвтрүүлэх зорилгоор ЧИП буюу монгол гэрийн халаалт, дулаалгын багц шийдлийг боловсруулах, хэрэглээнд нэвтрүүлэхээр ШУТИС-ийн Барилга архитектурын сургуулийн харьяа Барилгын эрчим хүч хэмнэлтийн төвтэй хамтран 2017 оноос төслийн туршилт, судалгааг эхлүүлжээ.
Ингээд 2019 оноос хэрэглээнд нэвтрүүлснээр өдгөө нийслэл, Баянхонгор, Говь-Алтай зэрэг аймгийн 1000 өрх хэрэглэгч нь болоод байгаа аж.
Төслийг хэрэгжүүлэгч Пипл ин нийд ОУТББ 2021-2022 оны хүйтний улиралд төсөл хэрэгжиж буй Говь-Алтай, Өмнөговь, Улаанбаатар хотын Баянзүрх дүүрэгт эрчим хүчний хэмнэлттэй ЧИП багц ашигласан 99 айл болон уламжлалт хэлбэрээр гал түлж өвөлжсөн 94 айлуудын дунд цахилгаан эрчим хүч, нүүрс, түлшний хэрэглээний судалгааг явуулжээ.
Ингэхэд ЧИП багцаар гэрээ дулаалж, эрчим хүчний хэмнэлттэй халаагуур ашигласан өрхүүд долоон сарын дунджаар 56 мянган төгрөгийг хэмнэсэн үр дүн гарсан байна. Мөн уг багцыг сонгосон айл өрхүүд гал түлэхэд зарцуулдаг өдөр бүрийн 41 минутаа хэмнэж чадсан гэжээ.
Үр дүнд нь олон мянган хүүхдийн эрүүл мэндийн байдлыг сайжруулан, дулаахан, ая тухтай амьдрах орчин нөхцлөөр хангаж, гэрийн дотор орчны агаарын чанарыг дээшлүүлэхэд ихээхэн хувь нэмэр оруулж байна гэж төслийн багийнхан онцоллоо. Уг төсөл Орхон аймагт хэрэгжиж эхэлсэнтэй холбоотойгоор аймгийн зорилтот 50 өрхөд “Монгол гэрт зориулсан дулаалга, халаалт, агаар сэлгэлтийн ЧИП багц”-ыг маргааш гардуулж өгнө. Мөн Их залуу багийн байранд иргэд, олон нийтэд мэдээлэл өгөх Гэр мэдээллийн төв ажиллаж эхлэх юм.
Монгол эрдэмтийн бүтээсэн монгол гэр дулаалга, халаалт, агаар сэлгэлтийн ЧИП багц нь дулаалга, халаалт, агаар сэлгэлтийн гэсэн үндсэн гурван багцаас бүрдэнэ.
Тухайлбал, дулаалгын багцад уур нэвтрүүлдэггүй бүрээс, ус нэвтрүүлдэггүй завсрын бүрээс, дулаалгатай хормойтой шалавч, хормойтой хаяавч, хатавчны дулаалга, хаалганы дулаалга, дулаалгатай өрх зэрэг хэсгээс бүрдэж байна.
Мэдээллийн төв
