“АЧИТ ИХТ” ХХК хамтын ажиллагааны хүрээнд 14 дүгээр сургуулийн химийн лабораторийг иж бүрэн тохижууллаа
Аймгийн Засаг даргатай байгуулсан хамтын ажиллагааны гэрээний хүрээнд “Ачит Ихт” ХХК нь Байгалийн ухааны гүнзгийрүүлсэн сургалттай ЕБ-ын 14 дүгээр сургуулийн химийн лаборатори кабинетийг 57 сая төгрөгийн үнэ бүхий иж бүрэн тоног төхөөрөмжөөр тохижуулж, өнөөдөр хүлээлгэн өглөө. Үйл ажиллагаанд аймгийн Засаг даргын орлогч А.Түвшинжаргал, “Ачит Ихт” ХХК-ийн захирал Ш.Батболд, 6-12 дугаар ангийн сурагчид бусад албаны хүмүүс оролцов.
Ерөнхий боловсролын 14 дүгээр сургууль нь 2019 онд химийн кабинетаа байгуулж байсан хэдий ч сурагчид туршилт хийхэд шаардлагатай тоног төхөөрөмж дутмаг байсан юм. Ийн тоног төхөөрөмж, бодис, хэрэглэгдэхүүнээр хангагдасанаар нэг удаад 45 сурагч химийн туршилт явуулах боломжтой болж байна.
Аймгийн Засаг даргын орлогч А.Түвшинжаргал “Орхон аймгийн хүүхдүүд уул уурхай дагасан хотод амьдарч байгаа гэдэг утгаараа химийн шинжлэх ухааныг илүү үзэж судлах сонирхолтой, хэрэгцээ шаардлага байдаг. Энэ ч утгаараа аймаг, улс цаашлаад олон улсад химийн хичээлээр өндөр амжилт үзүүлэх боломжтой гэж харж байна” гэв.
“Ачит Ихт” ХХК-ийн захирал Ш.Батболд химийн сургалтыг дэмжиж байгаа шалтгаан нь манай компанийн үйлдвэрт төдийгүй, уул уурхайн салбарт ажиллах боловсон хүчинд нэн шаардлагатай химийн шинжлэх ухааны мэдлэгийг нэмэгдүүлэх зорилготой юм. Цаашид энэ уламжлалаа хадгалан дараа дараагийн ерөнхий боловсролын сургуулиудад химийн лаборатори байгуулж өгнө” гэлээ.
Өнгөрсөн зургаадугаар сарын 9-нд Засаг дарга С.Батжаргал “АЧИТ-ИХТ” ХХК-ны удирдлагууд 2022 оны хамтын ажиллагааны төлөвлөгөөг баталж, үзэглэсэн. Уг төлөвлөгөөнд “Тэрбум мод” үндэсний хөдөлгөөн, “Ногоон Эрдэнэт” хөтөлбөрийн хүрээнд мод үржүүлгийн газар байгуулах, боловсрол, хүүхэд залуусын хөгжилд хувь нэмэр оруулах, ажлын байр нэмэгдүүлэх, бизнес эрхлэгчдийг дэмжих чиглэлээр хамтын ажиллагааны хороогоор хэлэлцэн зөвшилцөж тус бүр 7 арга хэмжээг тусгасан юм.
Тус компанитай 2021-2024 онд хамтран ажиллах гэрээг байгуулсан бөгөөд гэрээний дагуу энэ оны хамтын ажиллагааны төлөвлөгөөг баталсан. 2021 оны хамтын ажиллагааны төлөвлөгөөнд нийт 10 арга хэмжээ төлөвлөж 94 хувьтай хэрэгжүүлсэн байна.
Мэдээллийн төв
