Төрийн албаны ерөнхий шалгалт эхэллээ
Монгол Улсын төрийн албаны ерөнхий шалгалт өнөөдөр 08:30 минутад улс орон даяар нэгэн зэрэг эхэллээ. Энэ удаагийн ерөнхий шалгалтад улсын хэмжээнд 5400 иргэн бүртгүүлсэн бол Орхон аймгийн хувьд 141 иргэн бүртгүүлжээ.
Аймгийн хэмжээнд 10-р сарын 14, 15-ны өдрүүдэд 7 ээлжээр, нэг хэсэгт 21 иргэнийг оролцуулан шалгалтаа зохион байгуулж байна.
Шалгалтын явцад Монгол улсын Төрийн албаны зөвлөлийн гишүүн С.Цэдэндамба хяналт тавин ажиллаж байгаа бөгөөд төрийн албаны Орхон аймаг дахь салбар зөвлөлийн гишүүд, ажлын хэсгийн гишүүд зохион байгуулан ажиллаж байна.
Энэ намрын ерөнхий шалгалт хэд хэдэн онцлогтой. Шинэчилсэн хуулиар улирал бүр зохион байгуулагдах болсон нь иргэдэд хүлээлт үүсгэхгүй давуу талтай болсон. Энэ удаагийн шалгалтын онцлог нь ерөнхий шалгалт хаана өгснөөс үл хамаарч, шалгалтдаа тэнцсэн тохиолдолд харьяалал хамаарахгүй төрийн жинхэнэ албаны нөөцөд бүртгэгдэн тусгай шалгалт өгөх эрхтэй болно.
Шалгалтын даалгавар хүн тус бүрт өөр буюу цахим программын санамсаргүй сонголтын зарчмаар сонгогдсон байна. Тус шалгалт нь ерөнхий мэдлэг, дүн шинжилгээ хийх чадвар, монгол, хэл бичгийн шалгалт гэсэн гурван агуулгаас бүрддэг. Шалгалтад тэнцсэн иргэд төрийн албаны нөөцөд бүртгэгдэх юм.
Мэдээллийн төв
