Өвлийн спортыг дагаад аялал жуулчлалыг хөгжүүлж чадсан туршлагаас судалж хэрэгжүүлэх үүрэг өглөө
Орхон аймагт өвлийн спортыг хөгжүүлэх хөтөлбөрийн 2022 оны хэрэгжилтийн талаар өнөөдөр Засаг даргын зөвлөлийн хуралд танилцууллаа. Тайлангийн үеэр Орхон аймаг 2023 оны өвлийн спортын наадмыг орон нутагтаа зохион байгуулахаар төлөвлөж байгаа талаар мэдээлэл өглөө. Мөн өвлийн спорт хөгжсөн улс орон түүний дотор өвлийн спортыг дагаад аялал жуулчлалыг хөгжүүлж чадсан туршлагаас судалж суралцах талаар Засаг дарга С.Батжаргал мэргэжлийн байгууллагуудад үүрэг өглөө.
Орхон аймаг 2022 онд өвлийн спортыг хөгжүүлэх хөтөлбөрийн хүрээнд “Эрдэнэт мөнгөн өвөл-2022” аяныг зохион байгуулж нийт 250 гаруй тамирчдыг хамрууллаа. Түүнчлэн аяны хүрээнд Монголын үндэсний "Цасан зам" спортын холбоотой хамтран багш боловсон хүчнийг чадавхижуулах сургалтуудыг зохион байгуулжээ.
2022 онд Орхон аймгийн 162 тамирчин өвлийн спортын төрлөөр улс, тив дэлхийн 10 тэмцээнд оролцож 151 медаль хүртсэн амжилтыг үзүүлсэн. Үүнээс онцолбол Ази тивийн аварга шалгаруулах биатлоны тэмцээнд 1 мөнгө , 2 хүрэл медаль авч Монголын биатлоны спортын түүхэнд анхны тивийн медалийг эх орондоо авчирсан юм.
Өвлийн спортыг хөгжүүлэх чиглэлээр идэвх санаачилгатай, амжилттай ажиллаж байгаа цанын 3 клубт орон нутгийн төсвөөс дэмжлэг үзүүлж 12 ширхэг цана, 8 ширхэг тэшүүр зэрэг хэрэглэл материалыг олгож цанын шигшээ баг тамирчдыг бэлтгэл сургуулилт хийх нөхцлөөр хангасан байна.
Орон нутагтаа өвлийн спортыг хөгжүүлэх зорилгоор томоохон арга хэмжээнүүдийг зохион байгуулж баг тамирчдын бэлтгэл сургуулилт хийх нөхцөл боломжийг дээшлүүлж, иргэдийн оролцоо зэргийг нэмэгдүүлэн ажиллаж байгааг Биеийн тамир спортын улсын хороо зэрэг томоохон байгууллагууд онцолжээ.
Мэдээллийн төв
