Бүгд Найрамдах САХА улсын /ЯКУТ/ Усть-Алдан аймгийн төлөөлөгчид Орхон аймагт айлчилж байна

Бүгд Найрамдах САХА улсын /ЯКУТ/ Усть-Алдан аймгийн Засаг дарга Алексей Васильевич ФЕДОТОВ, Засаг даргын орлогч Семён Семёнович БУРНАШЁВ, Боловсролын газрын дарга Гаврил Гаврильевич ТИМОФЕЕВ, Силим ХХК-ын захирал Александр Афанасьевич НЕУСТРОЕВ нарын төлөөлөгчид энэ өдрүүдэд Орхон аймаг, Эрдэнэт хотод айлчилж байна.

Өнөөдөр төлөөлөгчдийг аймгийн ИТХ-ын Нарийн бичгийн дарга Д.Эрдэнэцэцэг, ЗДТГ-ын даргын албан үүргийг түр орлон гүйцэтгэгч Ш.Ганбалд тэргүүтэй бусад албаны хүмүүс хүлээн авч уулзлаа. Уулзалтын эхэнд ЗДТГ-ын даргын албан үүргийг түр орлон гүйцэтгэгч Ш.Ганболд уулзалтад оролцож буй албаны хүмүүсийг танилцуулав. Үүний дараа ИТХ-ын Нарийн бичгийн дарга Д.Эрдэнэцэцэг Орхон аймаг, Эрдэнэт хотын талаар товч танилцуулга мэдээллийг өгсөн. Тэрээр 1960,1970 онд илгээлтийн эзэд майхан дэвссэн тэр үеэс өнөөгийн Орхон аймаг, Эрдэнэт хотын суурь тавигдаж, 21 дүгээр зууны манлай хот болтлоо хөгжин, өргөжин тэлж байна.

Нутгийн өөрөө удирдлагын ёс, төрийн удирдлагын ёсыг хослуулан үйл ажиллагаа явуулдаг, 100 мянга давсан хүн амтай, үйлдвэрлэл, бүтээн байгуулалт өрнөсөн аймаг болохыг онцлон хэлэв.

Усть-Алдан аймаг нь 21 хот, түүний дагуул 25 тосгонтой Якут улсын томоохон суурин газруудын нэг. Эдийн засгийн үндсэн чиглэл нь мал аж ахуй, газар тариалан эрхэлдэг ажээ. Шууд харилцаатай, хамтын ажиллагаатай хотуудтайгаа спорт, соёл урлагийг хөгжүүлэхэд голлон анхаарч ажилладаг талаар Засаг дарга Алексей Васильевич федотов хэлэв.
Хоёр орны бүс нутаг хоорондын хамтын ажиллагаанд түлхэц өгөх, ялангуяа хөдөө аж ахуй, уул уурхай, соёл спорт, боловсролын салбарын хамтын ажиллагааны талаар талууд санал солилцлоо.

Мэдээллийн төв