Орон нутгийн бизнес эрхлэгчид Эрдэнэт ШУТП-ийн үйл ажиллагаатай танилцаж байна
Германы Олон Улсын Хамтын Ажиллагааны Нийгэмлэгтэй хамтран ажилладаг аймаг нийслэлийн ЖДҮ эрхлэгчдийн төлөөллүүд танилцах аялал зохион байгуулж өнөөдөр Орхон аймагт ажиллаж байна.
Тус аялалын зорилго нь Улаанбаатар, Ховд, Булган, Орхон аймгийн жижиг дунд үйлдвэрлэл эрхлэгчид GIZ прогресс төслийн хүрээнд Орхон, Өмнөговь аймаг болон нийслэлийн бизнес хөгжлийн төвтэй танилцах, харилцан туршлага солилцох юм.
Үйл ажиллагааны нээлтэд аймгийн Засаг дарга бөгөөд Эрдэнэт хотын захирагч С.Батжаргал оролцож туршлага солилцож, мэдлэг мэдээллээ хуваалцаж яваа аялалын багт амжилт хүслээ.
ШУТП- нь анх байгуулагдахдаа орон нутгийн захиалгатай ТЭЗҮ судалгаа хийж, түүний орлогоос аж ахуй байгуулж, ААН-ийн орлогоос ирээдүйд тасралтгүй явуулах санхүүгийн нөөцөө босгох үндсэн зарчимтайгаар ажиллаж эхэлсэн. Эхний 4 жилийн дотор 3 ААН байгуулсан бөгөөд мэдлэг, инноваци, технологийн туршлага хуримтлуулсан нь гол онцлог байсан гэдгийг ШУТП-ийн захирал О.Энхбаяр хэлж байна.
Орхон аймгийн хувьд 2017 онд байгуулагдсан “Эрдэнэт ШУТП” нь Германы хамтын ажиллагааны нийгэмлэгтэй Орхон аймгийг төлөөлж 2021-2023 онд хамтран ажиллах үндсэн гүйцэтгэгчээр ажиллаж байгаа.
Төслийн үйл ажиллагаа эхэлсэнээс хойш 3 зөвлөх компани, 2 зөвлөх багшийн бүрэлдэхүүнтэй үндэсний зөвлөх багтай хамтран 71 удаагийн сургалт, зөвлөх үйлчилгээгээр давхардсан тоогоор 169 ААН-ийн 752 бизнес эрхлэгчдийг чадавхжууллаа.
2021 онд бичил, жижиг дунд үйлдвэрлэл, гарааны бизнес эрхлэгчдийн үйл ажиллагаанд шаардлагатай тоног төхөөрөмж худалдан авахад зориулж 6 дэд төслийн хүрээнд 28 ААН-д 300 сая төгрөгийн буцалтгүй дэмжлэг үзүүлээд байгаа юм. Түүнчлэн Орхон аймгийн хоршоод, аялал жуулчлал, оёдолчдыг чадавхижуулах чиглэлээр мэргэжлийн байгууллагуудтай хамтран ажиллаж байгаа ажээ.
Мэдээллийн төв
