Аймгийн ЗДТГ-ын дарга Д.Соёлчхүү Монгол Улсын "Төрийн албаны Тэргүүний ажилтан" цол тэмдгээр шагнууллаа
Аймгийн ЗДТГ-ын дарга бөгөөд Төрийн албаны салбар зөвлөлийн дарга Данзангийн Соёлчхүү Монгол Улсын "Төрийн албаны Тэргүүний ажилтан" цол тэмдгээр шагнагдлаа. Ардын хувьсгалын 100,101 жил, Эрдэнэт хот үүсэн байгуулагдсаны 45,46 жилийн ой, Үндэсний их баяр наадмын босгон дээр Монгол Улсын Төрийн албаны зөвлөлөөс аймгийн ЗДТГ-ын дарга бөгөөд Төрийн албаны салбар зөвлөлийн дарга Д.Соёлчхүүд "Төрийн албаны тэргүүний ажилтан" цол хүртээлээ.
Шагналыг өнөөдөр ЗДТГ-ын албан хаагчдын баярын хурлын үеэр Засаг дарга С.Батжаргал гардууллаа. Монгол Улсын "Төрийн албаны тэргүүний ажилтан" цол тэмдэг нь Төрийн албаны төв байгууллагаас төрийн албан хаагчдыг шагнадаг шагнал юм. Шагналын журамд зааснаар төрийн албанд тогтвортой олон жил ажиллаж, төрийн албаны чиг үүрэг, хуулиар хүлээсэн үүргээ үнэнч, шударгаар биелүүлэн, мэргэжлийн өндөр ур чадвар, амжилт гаргасан, төрийн албаны үйл хэрэгт бодитой хувь нэмэр оруулсан төрийн албан хаагчийг шагнадаг ажээ.
Жилд хоёрхон удаа цөөн хүнд өндөр шалгуураар олгодог энэхүү нэр хүндтэй шагналыг Төрийн албаны эрх зүйн шинэчлэлд оруулсан хувь нэмрийг нь өндрөөр үнэлэн ЗДТГ-ын дарга Д.Соёлчхүүд хүртээлээ.
Төрийн албаны тогтолцоог боловсронгуй болгон бэхжүүлэхийн төлөө үр бүтээлтэй ажиллаж байгаа Монгол Улсын Төрийн албаны зөвлөлийн Орхон аймаг дахь салбар зөвлөлийн дарга, ЗДТГ-ын дарга Д.Соёлчхүү Танд аймгийнхаа удирдлагууд болон ЗДТГ-ын хамт олон, аймгийн 4000 гаруй төрийн албан хаагдчын нэрийн өмнөөс баяр хүргэж, цаашдын ажилд тань амжилтын дээдийг хүсэн ерөөе.
Мэдээллийн төв
