Улсын заан цолтой бөхчүүдэд хүндэтгэл үзүүлэх барилдаанд долоон заан цолтон зодоглож байна
“Эрин зууны бахархал Эрдэнэт” хотын 50 жилийн ойн хүрээнд зохион байгуулж буй Монгол Улсын заан цолтнуудад хүндэтгэл үзүүлэх чансаа өндөр 128 бөхийн барилдаан Монгол бөхийн өргөөнд эхэллээ.
Улсын заан цолтнуудад хүндэтгэл үзүүлэх барилдаанд Улсын арслан Цэдэнсодномын Бямба-Отгон, Улсын гарьд Өлзийтогтохын Бат-Орших, Улсын харцага Шархүүгийн Пүрэвгарьд, Лхагваагийн Лха-Очир тэргүүтэй 128 бөх зодоглож байна. Улсын заан цолтнуудаас Баатархүүгийн Пүрэвсайхан, Батзоригийн Батмөнх, Доржийн Анар, Мөнхтөрийн Лхагвагэрэл, Цэдэнбазарын Одбаяр, Бердимуратын Серик, Доржхандын Хүдэрбулга нарын долоон заан цолтон уран мэхээ уралдуулан үзэгч түмнээ баясгаж байна.
Монгол Улсын заан цолтнуудад хүндэтгэл үзүүлэх барилдааныг 1996 онд тухайн үеийн үндэсний бөхийн өнгийг тодорхойлж, бөх сонирхогч, наадамчин олноо уран мэхээрээ баясгаж байсан залуу зургаан зааны алдар гавьяа, амжилтыг алдаршуулах зорилгоор анх зохион байгуулж эхэлсэн түүхтэй.
Үүнээс хойших 14 дэх барилдаанаа “Эрин зууны бахархал Эрдэнэт” хотын 50 жилийн ойн хүрээнд хоёр дахь удаа Монгол бөхийн өргөөнд зохион байгуулж буй нь энэ юм. Барилдааны түрүү бөх 20 сая, үзүүр бөх 10 сая, шөвгөрсөн бөх нь 5 сая төгрөгийн бай шагналтай.
Ерөнхий ивээн тэтгэгчээр "Гал сэнтий" ХХК ажиллаж байна. Тус компани нь уул уурхайн үйл ажиллагаанаас үүсэх байгаль орчны сөрөг нөлөөллийг бууруулах, усны нөөцийг хамгаалах, байгалийн баялгийг зохистой ашиглах зорилгоор 2016 оноос эхлэн ус цэвэршүүлэх, зэс үйлдвэрлэх үйлдвэрийн туршилт судалгааны ажлыг эхлүүлэн, 2019 онд хүдрийн овоолгоос шүүрэх хүчиллэг уусмалыг цэвэршүүлэхийн зэрэгцээ катодын зэс үйлдвэрлэх хосолсон дэвшилтэт технологийг Монгол Улсад анх удаа нэвтрүүлэн амжилттай хэрэгжүүлж буй үйлдвэр юм.
Мэдээллийн төв
