Найрамдал, Чандмань, Цагаанчулуут багийн иргэдтэй уулзлаа
Иргэдийн уулзалт Найрамдал, Чандмань, Цагаанчулуут багийн иргэдтэй уулзах уулзалтаар үргэлжиллээ. Аймгийн Засаг дарга Б.Зоригтбаяр уулзалтын эхэнд 2025 онд хийж хэрэгжүүлсэн ажил, 2026 онд хийхээр төлөвлөсөн ажлаа танилцуулав.
Мөн тэрээр, Эрдэнэт хотын 50 жилийн ой угтаж хийх ажлын талаар мэдээлэл өгч, ирэх 7-р сард бүтээн байгуулалт, хөрөнгө оруулалтын ажлынхаа 70 хувийг дуусгасан байхаар төлөвлөж буй талаараа хэллээ. 2025 онд 53 байршилд 12,5 км авто замыг өргөтгөж шинэчилсэн. Энэ онд 4 байршилд шинээр авто зам тавьж, хотын төвийн хотын төвийн 13,8км авто замыг шинэчилнэ.
Хотын цэвэр усны шугам сүлжээний гол зангилаа нь Кувэйтын гудамж, Аюулгүйн тойрог орчимд бий. Энэ хэсгийн шугам сүлжээгээ шинэчилнэ. Ингэхдээ нэг газар ухалтаар шугам сүлжээгээ хонгилын системд оруулж, давхар гүүрэн гарцтай авто зам хийхээр төлөвлөсөн.
2026 онд боловсролын салбарт 47,3 тэрбум төгрөгийн хөрөнгө оруулалтын ажил хийнэ.Тодруулбал, Найрамдал багт орон нутгийн 10 тэрбум төгрөгийн төсөвтэй 280 хүүхдийн цэцэрлэгийн барилгын ажил эхэлнэ. Энэ онд 3 тэрбум төгрөгийн санхүүжилтыг тусгасан. 2027-2028 оны хичээлийн жилд цэцэрлэгийн барилга, тус багт улсын төсвийн хөрөнгө оруулалтаар баригдаж буй 960 хүүхдийн суудалтай сургуулийн барилгыг тус тус ашиглалтад оруулахаар төлөвлөж байна.
Иргэдийн зүгээс Их хаад, Амарсу-2 зэрэг орон сууцны байруудын хүйтэн, халуун усны хүртээмж муу байгаа талаар санал хэллээ. Эрдэнэт Ус ДТС ОНӨХК нь 2026 онд 4 ЦТП-д хүйтэн усны өргөлтийн насос суурилуулснаар дээрх асуудал шийдэгдэнэ.
Аймгийн Засаг дарга Б.Зоригтбаяр "Бид тогтвоотой уул уурхайг хөгжүүлнэ гэж ярьдаг шигээ гэр бүлийн тогтвортой байдлыг бий болгох нь чухал байна. Сүүлийн жилүүдэд гэр бүл салалтын тоо нэмэгдэж, бодлогын түвшинд анхаарах асуудал болжээ. Иймд "Бүх хайраа гэр бүлдээ" төслийг боловсруулж, эхлүүлэхэд болсон" талаараа мэдээлэл өглөө.
Багийн иргэд эрүүл мэнд, хөрөнгө оруулалт бүтээн байгуулалтын ажил, газар, шугам сүлжээтэй холбоотой асуудлаар санал хүсэлтээ илэрхийлж асуулт асуун холбогдох албаныхнаас хариултаа авлаа.
Мэдээллийн төв
