Иргэдийн уулзалт: Гэр хороололд 70,4 км гудамж хоорондын хоёр мөрт авто зам тавина

Аймгийн Засаг дарга Б.Зоригтбаяр, хэлтэс агентлагийн дарга нарын хамтаар иргэдтэй хийх уулзалт Рашаант, Наран, Уртын гол багаас эхэллээ. Уулзалтаар 2025 онд хийж хэрэгжүүлсэн ажлаа тайлагнаж, 2026 онд хийж хэрэгжүүлэх, хөрөнгө оруулалт бүтээн байгуулалтын ажлаа танилцуулж байна.

2025 онд орон нутгийн төсвөөр болон Болзошгүй аваарын зардлаар 38 гаруй тэрбум төгрөгийн хөрөнгө оруулалтаар 85 байршилд инженерийн шугам сүлжээний засвар, шинэчлэл, 46 тэрбум төгрөгийн хөрөнгө оруулалтаар 105 нэр төрлийн цахилгаан эрчим хүч шинэчлэлийн ажил хийж гүйцэтгэсэн.

Тухайлбал, Наран, Уртын гол, Рашаант багт тус бүр 2 байршилд 10кВт-ын дэд станц шинээр суурилуулж, цахилгаан хангамж сайжруулсны үр дүнд хүчдэлийн уналтгүй боллоо. Хөрөнгө оруулалтын ажлын үр дүнд цахилгаан эрчим хүчтэй холбоотой дуудлага 70 гаруй хувиар буураад байна.

Энэ онд авто замын засвар, шинэчлэлийн ажил үргэлжилнэ. Гэр хорооллын 13 багт 70.4 км гудамж хоорондын хоёр мөрт зам шинээр хийнэ. Гэр хорооллын багт тавих шаардлагатай байгаа хоёр мөрт авто замын 80 хувийг нь энэ жил хийхээр төлөвлөсөн.

Аймгийн хэмжээнд 8-11 жилийн хугацаанд бүрэн дуусаагүй царцсан 9 барилга байна. 7 барилгыг 2026, 2027 онд ашиглалтад оруулахаар зорьж буй. 2026-2027 оны хичээлийн жилд Рашаант багийн 250 хүүхдийн суудалтай сургуулийн барилгыг улс, орон нутгийн төсвийн хөрөнгө оруулалтаар ашиглалтад оруулна.

Энэ онд хорооллын эцсийн ерөнхий боловсролын 3-р сургуулийн гаднах биеийн тамирын талбайг шинэчилж, хүүхэд залуусын чөлөөт цагаа өнгөрүүлэх орчинг бүрдүүлнэ. Мөн багийн сургууль, цэцэрлэг, өрхийн эмнэлэг, соёлын төвийг шаардлагатай тоног төхөөрөмж, техник хэрэгслээр хангана.
Рашаант багийн Ахмадын байранд их засвар, 26-р цэцэрлэгийн уулзвараас улсын чанартай А1002 дугаартай авто замын уулзвар хүртэлх авто замыг шинэчилхээр төлөвлөөд байна.

Мэдээллийн төв